SA KOTO oqo e ra na serekali ka kena i ulutaga sa toka oqori e cake ena nona vakarautaka mai o Peni Sarai ka vakaitikotiko e Tavakubu mai Lautoka.
Ni tei wiliwili sara yani:
Cepi me ratou sa tokatu na veitamani
Ijipita na vanua e kilai tani
Totoka tu na draki ni veikauwaitaki
Vei iratou na i lawalawa mai Turakisitani
Bula veimaliwai ni veilomani
Dede vakalailai, uqeti tu na yalo i Tura
Me sa taura tale e dua na watina
E marama ni Aferika
O Nai na yacana dina
Lima na gone e laki kune kina
Yacadratou meu tukuna mada
Degei e ulumatua vei ira kece sara
Waicalanavanua qai tarava
Nakumilevu kei Rokola na matai wararasa
Kiranamoli e gone duadua sara
Lutunasobasoba e sa nanuma
Me sa vauca e dua na marama ni Ijipita
Ranadinisei na yacana dina
Lewe vitu kina na luvedrau dina
Duabulu walega na yalewa au wilika
Yalewa duadua o Buisavulu
Qai tarava yani o Rokomouto
Ratou veitarataravi yani o Tuinayau
Romelasiga, Rokoratu kei Sagavulunavuda
Daunisai e gone taudua
Vakasakiti tu o Ijipita
Ni dua na vanua e dau qaravi Kalou dina
Yaco me veisau na gauna
Kalou lasulasu era sa vakanamata kina
Dua tani talega na i vakarau ni nodra bula
Yacova mai e dua na gauna
Tui Osairisi sa veiliutaki kina
Nona veiliutaki e rui maqosa dina
Ka ni rarawa ni mai tini koso na nona bula
Labati koya ga na luvena dina
Tui Osairisi me ra sa laki buluta
Tavuki talega na yalodra na kai Ijipita
Yalo ni nodra Tui me ra sa qarava
Me sa nodra Kalou me ra vakaliuca taumada
Ka biuta tani na Kalou era a dinata.
Lewe ni lakolako mai Turakisitani ra sa lomavata
Cepi na vanua me sa vagalalataki
Isa Cepi ko sa na biu koto mada
Kawa kei Viti me sa toso sara
Serekali qo mo vakabauta
Doketa Faisoni e i vakadinadina
Dua na i vola e a vola rawa
Ni ratou a tiko mai Cepi o Tura, Nai kei Sina
Lutunasobasoba talega kei na watina.
