SA solia na nona veivakadeitaki na i liuliu ni National Federation Party o Professor Biman Prasad ki vei ira eso tamata era sa vakacegu kei ira na peniseni ni na dikevi ka saumi kivei ira e dua na i wase ni i lavo kevaka e sa na vakaduria na i soqosoqo ka matanitu ka tarava.
E a vakaraitaka na tikina oqo o Prasad kivei ira e so na i Taukei kei ira na Idia dau veitokoni era osota yani na veivoskai oqo e na siga Lotulevu sa oti. Kuria ka vakaraitaka o Prasad na nona kere veivosoti vei ira na vakacegu mai na cakacaka e na i vakarau ka ra sega ni namaka era a sotava e na vica na yabaki sa oti.
E kaya ni na vakalawataka mera kua ni sotava tiko kina na dredre e na vuku ni peniseni kei na lawa ni yabaki ni cegu ni cakacaka.
A sa kacivaka oti na NFP ni na gadreva me tosoya na yabaki ni cegu mai na cakacaka ki na 60.
Tomana ka kaya talega ni gauna esa na veiliutaki kina na NFP e na dikevi na veiqaravi ni lavo musuki na Fiji National Provident Fund.
Kaya o koya ni dodonu me vakanamata vakabibi na FNPF ki na peniseni ka sega ni lavo e maroroi me baleta na gauna ni cegu ena cakacaka se dua na tobu ni i lavo ka me rawa ni vakayagataka na matanitu.
E tomana ka kaya ni sa rogoca tiko na matanitu veriliutaki oqo e so na tikina e vakaraitaka tiko na NFP. A kacivaka taumada na NFP na ena vakatuburi na peniseni vei ira na yabaki 70 ka sivia ki na $50. Sa qai kacivaka na matanitu, e na yakavi me vakayacori kina na veidigidigi ni na vakatubura na peniseni ki na $50 e na yabaki mai oqo.
Kaya o koya ni ratou marautaka na tikina oqori, ia, na taro e tiko, na cava e sa rui taura kina e dua na gauna balavu mera qai vakacegui kina o ira na sa qase sara e na noda vanua oqo.
