Update: 2:50PM ENA i talanoa ni tawani ni nodra yavutu oqo na Ratu ni Mali kei na kena kawa tamata e tekivu mai na nodrau sa cemuri na Ciri o Nakausabaria kei Cirinakaumoli me sa muria sobu na nodrau waqa na ucwai ka dewa mai Nakauvadra.
Sa donumaka e dua na vanua sa tavutu kina na waqa voleka na koro o Raviravi e na dakui Nakauvadra e na Tikina o Tokaimalo, rau sa sobu na matua e Drekeniwai volekata na koro makawa o Navavai ka sa tala na i vakabi ni waqa e Korotolu.
Rau sa qai tukuna na Ciri vei rau na matua se o rau na qase: Sa vinaka vakalevu na nomudrau sa mai qarava rawa na i tavi. Drau sa sobu mo drau sa takoso e ke.
Na i vanovano (lakolako) qoi mo drau kua ni oka kina baleta e sega ni macala keirau na yaco sara ki vei. Baleta keirau lako tu oqo ni keirau cala.
Oqo e baleta ni rau vakamatea na toa o Turukawa ka tekivu kina na i valu e Nakauvadra se o Narauyaba.
E talanoataka talega o Mosese Ritova e sa qai tarogi rau na qase ko i rau na Ciri.
Drau digia na cava mo drau kauta e ke, e kaya.
Kuria ka kaya o Ritova ni dua vei rau o Ratu ni Mali e sa qai digia na saqa ni wai.
Na kena i karua o tacina o Vukinavanua sa qai digia o koya na kisi ni qele.
Ko rau ruarua oqo e dua e tiko e Naseyani na kena kawa tamata kei na dua tale tiko mai na koro o Naqelecibi.
Ko Naqelecibi e vakayagataka tiko nikua na saqa ni qele.
E na gauna sa dau sisi mai kina na qele e Naqelecibi, oya e sa vakatakila ni yabaki ni sautu ka sa rawa ni vakila na Tikina o Nailuva.
Ia, vei Ratu ni Mali ka soli vei koya na saqa ni wai, e sa dua na ka na levu wai ka toka sara e na ulunivanua e cake na saqa wai koya.
E kakabasu kece ga na veitutu ni saqa ni wai oqo e na veirukuniulunivanua sigasiga e cake sara, kaya o Ritova.
Ia, e na gauna oqo e sa tubu tu ga kina na sila e na dela ni ulunivanua sigasiga ko ya.
E na gauna era laki butuka kina na lewe ni lakolako ni butu yavutu oqo e na vanua ko ya e sa solega koto na veico sigasiga ka oka kina na veisila ni vanua sigasiga.
E liu e dau vure mai na dela ni ulunivanua ko ya na wai.
Ia, e na siga e ratou gole kina ko ya e donu tu na wai.
E kakabasubasu sara e ra.
Rau a sobu ga e Drekeniwai na turaga veitacini oqo o Ratu ni Mali kei Vukinavanua e rau sa gole cake ki na veiulunivanua.
E na nodrau gole ko ya ki na veiulunivanua, e laki tao e liu o Ratu ni Mali e na vanua era sa lesuva mai na i lakolako ni butu yavutu makawa oqo.
Sa qai muria sobu sara o Vuikinavanua na tuatua me yacova ni sa dave tale mai na wai mai Naitasiri, Colo kei Naitasiri kei na kena siro mai vaka e Wainimala kei Wainibuka.
E tiko e loma ko ya e dua na tuatua.
Na nona gole ko ya o Vukinavanua e sa qai vakamuria na tuatua ka laki siro yani ka laki tiko sara e na koro o Naqelecibi.
E na nodrau veitataunaki, e rau sa qai tatau na qase.
Keirau lako mai, keirau na qai mai qusia na loaloa.
Kaya o Ritova era sega ni kila tiko se cava ko ya na i qusi ni loaloa.
Rau a kaya na Ciri ni rau na lako ka rau mai solevu tale vei rau na qase e rau sa mai sobu koso oqo me vaka ni rau a vakatalai no mai Nakauvadra ka vakavuna me rau vodo mai ko ya ka rau sobu koso e Drekeniwai e na kena coqa na tutu ni qele ko ya na nodrau waqa na Ciri.
