Update: 2:44PM A BAU maliwai ira na noda o Ratu Peni Latidavetalevu Draunidalo Naba 2, na Ratu ni Moturiki, ka curu e na mataivalu e na noda vanua, ia, e a maliwai ira na kena vo e na nodra vakatawa voli e Bainiwai.
E talanoataka na luvedra o Adi Emi Draunidalo ni dua na siga a lako yani ki vua e dua na nona i liuliu se Turaga Bale ( sega ni via cavuta na yacana) e na noda vanua ka kaya vei Ratu Peni ni sa vakarau lako ki Solomone.
A laki kerea yani vua me dua na nona i vakatawa e na buca ni valu, kaya o Adi Emi.
Sa qai kaya vua o Ratu sa vinaka daru sa na lako ki Leleuvia.
Oqo na yanuyanu ka tukuni ni a sema vata tu kei na Davetalevu ni bera ni lutu dromu na koro o Davetalevu.
Sa qai vo toka ga na yanuyanu o Leleuvia kei Caqalai ka rau ciri volekati Moturiki no.
Ia, e sega soti ni turaga dau talanoa vakalevu o Ratu Peni. E dau talanoa ga kevaka e dua e vakatarogi koya.
Rau mani laki tiko sara e na yasa i Leleiuvua i ra e na muana vaka ki na yanuyanu o Caqalai ka yacana o Navuturerega.
E kaya o Adi Emi ni gauna e rau sa yaco yani sa laki tiko e na dua na bolabola ka caka e na sasa.
Sa tukuna sara o Ratu e na bogi nikua o na vakatovolei vakatolu.
Kevaka o sa rawata sa na qai dua na nomu i vakatawa kina buca ni valu.
Ni sa lutu mai na karobo sa buto ka vagagalu na yanuyanu rau dabe toka e na nona vale vakacevaceva, rau sa rogoca ni sa dua na ka e sa tavasa yani.
Rau qai raica ni sa dolo yani e dua na gata levu ka vaka tu e rua na cina tabucagi na yaloka ni matana.
Dolo yani na gata ka siviti rau ka gole sara yani.
Kaya o Adi Emi ni tukuna o Ratu vua na Turaga me dei tiko me kua ni rere.
Na i karua ni veivakatovolei e sa qai yaco mai e na kena dodo mai e dua na rarama ni cina mai Nasautabu.
O Nasautabu na yavu ni vale nei Tui Davetalevu, na i liuliu ni koro ka lutu dromu volekati Moturiki.
Kuria ka kaya ni sa oti e vica na miniti sa qai boko na cina. Oti sa qai yaco mai na i katolu ni veivakatovolei sa qai dolo mai e dua na dakudakulaci.
Sega soti ni ka levu se ka lailai sara.
E volekata toka ga na veimama.
Tomana ka kaya o Adi Emi ni sa qai dolo mai ka mai taqa sara na uluna e na sagai koya na turaga oqo ni dabe toka vakatoga.
Vakalailai sa kaya sara yani o Ratu, oqori na nomu i vakatawa ki na buca ni valu.
Kaya o Adi Emi ni a se sega ni tiko e na veisoli oqori mai vua na nona Ratu kei na turaga Bale ko ya baleta ni se bera niu sucu kina.
Ia, e vakadeitaka ga o koya ni oqori na i talanoa nei nona Ratu.
Ni sa oti na i valu kau sa yabaki tini voli sa qai kauti au o Ratu me keirau gade ki vua na Turaga oqo kau raica se davo koto ga e yasana na dakudakulaci ko ya.
Sa qai kaya o Ratu, raica na dakudakulaci, oqori na nona i vakatawa.
