ENA toso cake sara na nodratou qito na timi ni Viti ena sotasota mai Niusiladi ena mua ni macawa oqo, baleta ni ratou sa na qito ga ena i vakarau donu ni raba ni rara e dau caka kina na qito rakavi.
Oqori na nona rai o Peni Veidreyaki ka dauniveivakatavulici tu e liu ni timi ni Viti ena qito lewe yavitu.
E kaya ni ratou sa na rawa ni vakaraitaka na nodratou kila kei na nodratou taledi na noda cauravou ena qito na mua ni macawa oqo.
Au kila ni ratou sa na veitalanoataka sara vakalevu na veika me ratou vakavinakataka ni oti na qito mai Las Vegas.
E sa na tiko talega na nodratou tuvatuva se na cava me ratou na vakayacora ni tekivu na qito vakatobu ena siga Vakaraubuka, vakabibi ni ratou sota kei na timi ni Niusiladi ena i matai ni qito, e kaya o Veidreyaki.
E vakanuinui vinaka talega ni ratou na qarava vinaka na nodratou i tavi na cauravou, ena vuku ni nona digitaki iratou o Ben Ryan me ratou matataka na noda matanitu ki na sotasota oqo mai Niusiladi ena kena veisisivitaki tiko na HSBC World Sevens Series.
E na bibi vei ratou me ratou na vakadeitaka ni kacivi ratou o Ryan, vakauasivi na kaci ni noda vanua kau vakanuinui tu ni ratou na tataunaka tiko na nodratou bula kei na nodratou qito kece vua na Kalou, e kaya.
Ia,e vakaraitaka o D.J.Forbes ka lewe ni timi ni Niusiladi ni okata namatai ni qito vakatobu kei Viti me fainala.
Kaya o koya e sa vakadinadinataki e na nodrau sota vakatobu mai Las Vegas, ia, na kena oqo e sa na okata sara tikoga me fainala.
E na nodratou mai qito ni vakavakarau na noda cauravou e ratou a sota vata kei na timi ni Welesi ena siga Tusiti., ni bera ni na qai digitaka o Ryan na timi ena sota kei Niusiladi ena i matai ni qito vakatobu e na rua na kaloko (2pm) ena yakavi ni nimataka, na Vakaraubuka .
