NA vuna levu duadua e lailai tiko kina na nodra i lavo maroroi na tamata cakacaka e na Fiji National Provident Fund (FNPF), e vu tikoga mai na lailai ni kedra i sau.
E vakadeitaka mai na i tukutuku oqori na i liuliu se CEO, o Jaoji Koroi e na Moniti.
E kaya o Koroi ni vakadidike e ratou vakayacora, e vakaraitaki mai kina ni 29 na pasede, mai na 429,936 na lewena, e levu e lailai mai na $10,000 na nodra i lavo musiki e na gauna oqo.
Dua talega na ka e vakaraitaka o Koroi ni vu tiko ni lailai ni lavo maroroi, o ya ni sa rui levu na nodra kerei lavo (withdraw) na lewena.
Tomana talega o Koroi ni vuqa sara na i taukei ni cakacaka e na noda vanua, era saumi ira tiko na nodra tamata cakacaka e na i lavo lailai walega, ka vakavuna tiko na kena lailai na nodra i lavo maroroi, ka musuka tiko mai oi taukei ni cakacaka.
Kuria o Koroi ni mai vei ira na lewe 57,000 na lewena ka ra sa sivita na yabaki 50, e dodonu me ra sa vulica rawa e dua na i walewale ni maroroi lavo, me rawa ni tauri ira tiko e na vo ni 5 na yabaki ka sa tu oqo e matadra.
E dua tale na ka me ra kila vinaka tiko na sa sivita na yabaki 50 ni dodonu me ra sa tugana lo tiko e lomadra se me ra na vakayagataka vakacava na nodra i lavo e na gauna era sa yabaki 55 kina.
Ia, mai na yasana e na baqe, e kaya o Koroi ni ra sa vakauqeti ira tiko na vakarau vakacegu me ra saga me ra vakacuruma vakalevu na nodra i lavo, ka me ra qai la’ki vakayagataka tu yani e na gauna ni nodra vakacagicagi.
E kaya o Jaoji ni dua na i tuvatuva e ratou sa vakarautaka tiko oqo na baqe, sa i koya na kena wasei laivi tiko e 70 na pasede na kedrai sau na tamatama cakacaka, ka lailai mai na $10,000, ka me ra na qai taura umauma ni sa ra yacova yani na yabaki 55.
“Kenai balebale o ya ni rawa ni ra na tatara tiko mai na loma ni 30 na pasede, me vakayagataki ki na vuli, na tara ni vale, na somate kei na vuqa tale na leqa tubukoso.
“Keitou sa vuli mai na gauna e liu, e na nodra vakayagataka ga vakalialia na tamata cakacaka , lewe ni i lavo maroroi na nodra i lavo, ka ra nanuma ni ra tatara tiko e na dua na baqe ga sa rawa,” kaya o Koroi.
Na veika kece e volai koto oqori e cake e cauraka tiko ko Koroi mai na Vualiku, e na dua na nodra soqo na lewe ni vanua era vakacuruilavo tiko e na FNPF, ka a vakayacori kina e na Vakarauwai sa oti.
