Update: 11:24AM ESA mai cava na nona dau qitotaka na qito rakavi tinikatolu o Semi Radradra ena sotasota ni NRL ka vakayacori tiko mai Ositerelia ena nona sa na la�ki vakaitavi ena sotasota ni Top 14 ena qito mai Varanise.
Na nona mai biuta na loma ni rara o Radradra ena bogi ni Vakarauwai sa oti ena gauna era wawa tu kina na daunivola i tukutuku mai Ositerelia a mani ratou veigaluvi yani na vo ni timi ni Eels ena nodratou sa vakila na nona sa na biuti iratou o Radradra ena nona sa na lako tiko ki Varanise ena konitaraki ka $1 na milioni na kena i sau.
Ia, ni toso tiko na gauna e na bogi ni Vakarauwai ena gauna e irovi yani kina na rumu ni veisau ni timi ni Parramatta, e laurai ga o Tim Mannah na kavetani kei Maichael Jennings ka rau dabe veibasai ena nodrau mai veigaluvi tu yani ka sega na veivosaki.
Ena lesu tale beka mai o Semi? Au vakabauta ni na lesu tale mai. E a tukuna cake mai na vosa oya o Mannah ena nona sa daramaka yani ki na liga ni nona jakete na ligana.
E tukuna o Mannah ni a rogoca vei Semi ni a vinakata o koya me na lesu tale mai. E vica na dauqito ena timi ni Parramatta era dau volekati Semi.
E kuria o Mannah ni tiki ni tosotoso ena Eels o Radradra ka sa mai lima na yabaki na nodratou qito vata mai.
Na gauna e vosa tiko kina o Mannah esa toso na liga ni kaloko me sivia na 45 na miniti ni oti na 11 ena bogilevu ka rau dabe taurua voli o koya kei Jennings ena loma ni rumu ni Eels.
E sega ni dua na dauniveivakatavulici, dauyadra se bau dua na rorogo, e sega.
Ia, e tarai rau na rua qo na nona sa mai biubiu o Radradra me sa na la�ki qito rakavi unioni ki Varanise.
E tarai rau na lewe rua qo na i tovo ni bula nei Radradra me tekivu sara ga mai na gauna e ratou veikilai kina me yacova na nona biubiu ena bogi ni Vakarauwai sa oti ni oti na qito.
