ESA na qarava vakalevu na yasana o Naitasiri na teitei me vaka e vakaraitaka ko Alivereti Nabulivou na jeameni ni Bose ni Yasana o Naitasiri. A vakaraitaka tiko ko Nabulivou na veika oqo ena Bose ni Yasana o Naitasiri ena Vakaraubuka sa oti.
E kuria o Nabulivou e dina ga ni sa kacivaka oti na matanitu na tuvatuva ni veika vakailavo ni 2017 kei na 2018, ia esa na namaka o Naitasiri na veivuke ni matanitu ena Minisitiri ni Teitei ena kena vakavatukanataki na tei cago (ginger), jaina, tavioka kei na yaqona.
E tukuna o Nabulivou ni veitabana qo esa ra votai oti tu kina na i lavo ni veivuke mai na Minisitiri ni Teitei, ka rawa ni veivuke vei ira ena veimataqali tei me teivaki.
E tomana o Nabulivou ni tikina kece e Naitasiri esa tu na nodra dui tuvatuva ni veivakatorocaketaki vakauasivi na veikorokoro kei na yasana.
E vakadeitaka o Nabulivou ni na qai vakayacori tale na Bose ni yasana o Naitasiri ena Tiseba qo. Ia, na bose siga dua qo era vosa sara tiko vakalevu na mata ni veitikina ena loma ni yasana ena vuku ni wai, gaunisala kei na kena gadrevi na veivuke mai na matanitu.
Ia, na veika lelevu esa na veivuke kina na matanitu ka sa vakaraitaki ena Bose ni yasana o Naitasiri e oka kina na tikotiko ni matanitu e Wainua, tikotiko ni matanitu e Vunidawa, qaravi ni wai e Toda, gaunisala mai Sawanikula ki Tubarua, gaunisala mai Nakorosule ki Nawaisomo, kei na tatakoso e Naganivatu.
Na veivuke talega ni tei yaqona kei na dalo e Lomaivuna kei Nabena. Na veivuke ni teitei ni painapiu e Natavea kei Waimalumalumu e Waidina. Na waqa vei ira na Soqosoqo ni Tabagone e Navolau.
Veivuke vei ira na tei tausala, yaqona e Nabukunivatu kei Naivucini kei na kakana draudrau e Baulevu.
