E LEVU na ka e kilai tani kina na noda vanua, oya ena vei nuku vulavula, wasawasa e makare, na senikau era se kei na manumanu era bula ena noda vanua.
Dua tale na ka e kilai tani kina na noda vanua, oya ena duidui isolisoli e soli vei keda.
Na isolisoli vaka na vilavilairevo mai Beqa, na kacivi ni ura damu mai Vatulele kei na kena kacivi na vonu e Nacamaki, Koro kei Namuana, e Kadavu.
So era tukuna ni oqo e vakatevoro, so tale era kaya ni oqo na nona isolisoli na Kalou.
E kaya o Ratu Isoa Uluiviti na i Vakatawa mai Namuana, Kadavu ni nodra rawa ni kaciva na vonu o ira mai Namuana, e sega ni vaka tevoro, se nodra kacivi na vu, kaya ni oqo e nona isolisoli na Kalou vei ira e Namuana.
?Na isolisoli oqo e soli me i vakaraitaki ni noda veiwekani kei na vanua.? e kaya.
Ena dua na gauna makawa sara esa nanumi me sa lakovi na wati Tui Namalata.
Uku na laca ka mua na ilakolako ki Nacamaki, Koro mera sa lai vosaki mai o Raunidalice na luvei Tui Naikasi me sa mai watidra na Tui Namalata.
O Tui Naikasi na vu kei Nacamaki ka solia vei ira na isolisoli ni kacivi ni vonu.
Oqo talega na vanua e qai vu kina na veiwekani ni nodrau veimataki o Namuana kei Nacamaki.
Vakadonui na veilakovi vakaturaga, ka sa mani mua lesu na ilakolako ki Kadavu ka sa vodo tiko kina o Raunidalice na Raluve kei Nacamaki.
Sa via oti e dua na gauna dede, e tukuni na kena itukutuku ni rau a gole na lai vakatakakana ko Raunidalice kei na luvena goneyalewa ena dua na gauna ena dua na ucuna ena toba o Namalata.
Ena meke era dau lagataka mai Namuana, ka tauri rawa e dua na kena ilavelave e cavuti tokaga kina na yacai Raunidalice ni ra a vesuka o ira mai Talaulia, ena Tikina o Nabukulevu.
Kaya toka na kena qaqa ni meke ni gauna era sa vesuki koya me sa kau ki Talaulia, qai uku e dua na loaloa levu, sala muria na uca kei na cagi.
Era sa lai tiko leqaleqa na tiko ena loma ni waqa ka nanumi me nimati na wai, na gauna vata oya sa vuki o Raunidalice me vonu, ka dro sara yani me lai vuni toka ena ucuna e Muaicaukala.
E na vuni toka na vonu ka na sega ni lamata cake mai ke dua mai Nabukelevu e tiko.
Ia, ena gauna oqo, e ratou dau kaciva na vonu o iratou mai Namuana.
Tarogi se cava na vuna e rawa ni kaciva kina o iratou mai Namuana ka sega e Namalata, e sa qai tukuna o Vuase ni oqo na isolisoli a soli vei iratou na nona Bati o Tui Namalata, mai na mataqali o Naivakasese.
?O iratou na nona Bati na Tui Namalata, e ratou bete talega ni kacivi ni vonu.?
Sa ikoya oya na vuna ena vude kina na vonu me vaka ni na dei ni kacivi koya o ira na nona bati na nona yadra, me vaka ni ra na rawa ni taqomaki koya.
Na Kacivi Ni Vonu
?Tiko sobu e baravi qo na vanua dau caka kina na cakacaka oqo.
?Ke sa vinakati me caka na cakacaka oqo, e dau lakoga mai na itukutuku vei iratou na bete ni kena kacivi na vonu, vakaraitaki e dua na yaqona, ra sa qai lako yani na kena vanua.
?Na veivakadonui ni kena kacivi na vonu e veivakadonui kina o turaga ni yavusa.
?Era sa na qai lai qarava na kena cakacaka na bete, na lewe ni mataqali o Naivakasese,? kaya ko Vuase.
Vaka oqo na nodra ivakamacala o Joseva Ravuaka na turaga ni mataqali o Naivakasese.
?Sa dau yaco mai vua na iliuliu ni yavusa na kerekere, ratou sa na qai kauta yani vei keitou na kena bete na yaqona, na yaqona ga ratou kauta yani.
?Na siga ga sa lokuci me caka kina na kaci, sa na qai tuki, lose na yaqona, me vudevude ni vonu ka yacana na yaqona visa. Gauna vata oya era sa vakarau na marama, na lewe ni koro, era na kacivi na vonu.
?Wili talega kina o ira na vakawati mai era rawa ni kaciva talega na vonu, na kaukauwa o ya sa vauci keimami vata kece mai. ?Koya qo ga na yaqona idiniataka tu, koya me kua ni maca. Dua tikoga na kena tabu, o ya me kakua ni tiko e dua e dra vaka Nabukelevu e na gauna e caka kina na kaci.
?Sa na tau vei ira na lai kaciva na vonu e dua na vosa ni vakadre, ia o keitou qo sa na gunu yaqona tokaga, me yacova nira lesu mai.
?Nira lesu mai era sa na qai mai vakavuravura. Sa tau na vosa ni vakavinavinaka, dua na kena lotu, qai tini na soqo ena siga oya.? kaya o Ravuaka.
Era tomana tale na Tui Namuana ni sa vuqa vaka vica era sa saga mera tabaka na vonu, ia qai sega ni rawa.
?Era sa mai lesu vakavica na sara vanua, tabu ni taba. Kevaka e taba ena duatani na ka ena laurai. Se mana tu mai na gauna o ya se mana tiko ena gauna oqo. Eda sa qai raica kina e sega ni dua na ka e caka me sega ni cakava na Kalou.?
1. Me cila na vula lutu na yakavi
Na italanoa sa kacivaki
Ena vale nei Tui Naikasi
Luvena yalewa o mai vosaki
2. Me biu ko Koro nodra yanuyanu
Mera soko lesu tale tu ki Kadavu
Ra sokota na wasa e maravu
Isa Vunisea sa Kabukabu
Sa kau tu na vonu damudamu
3. Raunidalice yaca ni marama
Me laki vosaki ki Namalata
Me laki watidra na nodra turaga
Sa vakabau na nodra sasaga
Ra sa kauta na gone marama
4. E vakaloloma na lutu ni draki
Raunidalice sa via gadi
Gadi sobu ki ucui Tabaji
Toba ko Tavuki e kosova yani
Laki yaco sara e ucui Soloqasi
5. Ko ira na dau era qoli mai
Era voce vonu e loma ni wai
Ko na Tabuga na koro ko Dagai
E dua na vonu sa laurai
Damudamu tiko e loma ni wai
6. Vonu damudamu sa cegu oca
Ra tubu cake ra laki roqota
Ki loma ni dreke ra vakadavora
Sa vakacegu sara na yalodra
Sa rawa tu na vonu totoka
7. Mera vakarewa mera lesu yani
Raunidalice waicala tale
Ra nimati koya tu ki takali
Vukici me vonu qai dro cake
Qai laki nodra na bui ni dali
8. Muaicaukala sa yaco yani
Ruku ni cakau vunitaki
Laki vuni tu e drau na yabaki
Drau vude mai mo drau saravi
Mai vei ira nomu katikati
9. Na kena gauna me dau raici
Era laga meke mera saulidi
Tubu cake mai vakaciriciri
Damudamu tu vaka drau ni tiri
10. Kedra na yalewa ni Nabukelevu
Era vakaliku loaloa levu
Nodra dagidagi na malumu dabu
Tubu cake mai vonu damudamu
Meu mai sarava sara e mataqu
11. Nona tubu tu na ka totoka
Damudamu tu vaka drau ni Tavola
Ko Talaulia ena toboka
Nunu sobu ki buto ni sauloa
12. Na italanoa meu sa tinia
Ko Talaulia kena meca dina
Me baleta ga nodra a qoliva
Wai cala tale drotaki ira
Na ka oqo sa yaco dina
Chorus:
Isa oilei na gone marama
Laki sobu ki Muaicaukala
Ena baravi mai Namuana
Na loma ni toba ko Namalata
Namaka na i talanoa ni nodra lakovi vakavanua ki Seaqaqa e dua na i wase ni lewe ni koro ko Namuana e na nodra gole tu ka la?ki ta dovu ni oti e 42 na yabaki.
