Update: 12:18PM
SA na vakuri tale mada yani na nona i lakolako ni lagasere nona na cauravou domo koula ni koro ko Waitabu mai na Yatu Lau e na nona la�ki sikova na vanua e dau dromu kina na matanisiga.
E kaya o qasenivuli vakacegu Iliesa Baravilala ni a yaco mai vei iratou e dua na veisureti, ke rawa ni bau gole yani o Rabukawaqa ki na koronivuli na Yanuya Village School mai na yatu Mamanuca.
E kaya o Baravilala ni qai kele mai na nodratou waqavuka na i lala ka ratou gole mai Naova, sa wawa tu yani o Rabukawaqa e na rara ni waqavuka e Luvuluvu, mai sema kece e Suva, ka toso sara na i lakolako sobu e na yasayasa vaka-Ra e na mataka caca ni siga ka tarava.
Kuria o Baravilala ni dau kamikamica na nodratou sota na i lala oqo, ni ratou dui veituyaki e na veiyasai Viti, sota ga i Suva, ka semati sara na i lakolako ki na veivakamarautaki wavoki.
�Sa dau totoka dina vakaoti, ka ca na kamikamica ni suka kei na loli,� e kaya.
Tomana o Baravilala ni ratou kele yani ki Namaka e na mataka ni siga Vakarauwai oya, vakayagataki e dua na i katalau warumisa, ka tomani tale na i lakolako ki na siti ni suka mai Lautoka.
E kaya o Baravilala ni gauna oya e se bera ni basika kina ki Denarau na i kelekele ni waqa me vaka e sa tu kina e na gauna oqo, ka ni vakalele ki na yatu Malolo, yatu Mamanua kei na yatu Yasawa balabalavu e se vakayacori kecega e na wavu mai Lautoka.
Kuria o Baravilala ni ratou a vakavodo e na wavu mai na Siti ni suka e na ciwa na kaloko e na mataka oya, e na waqa ni saravanua me sa mua yani na i lakolako ki na yatu Mamanuca.
Tomana e na nona kaya ni vaka ga e yayanitaki tu na dela ni waitui e na kena maravu, ka ratou la�ki vakacegu vakalailai ki Mana e na dua na i vakasigalevu vakarautaki e na Mana Island Resort.
�Uwou! sa daba sala na i vakasigalevu, ni keitou sa la�ki curu veimaliwai vata tu kei ira na vulagi saravanua, o cei e cata,� e kaya.
Kuria ni oti ga na vakasigalevu, sa kerei sara ke rawa ni bau vica mada na nona sere o Lagani e na dela ni veinuku e bati ni wai.
�Toso ga na nuku ni ra sa butuka na vulagi saravanua kei ira na cakacaka e na otela rogo oqo e dua na butu kai kei na tui boto vakaivua.
�Kadresu ga na soqo ni sa memela tu na domo i Lagani, ka muria yani na rogo kamica ni nodratou i vakatagi na Spinning Wheels, tayana na dela ni veinuku mai Mana, ula la sara ga,� tomana o Baravilala.
Kuria o qasenivuli vakacegu ni dua na kena cegu lekaleka, ka sa ia tale yani na vakavodo me tomani cake sara yani na i lakolako ki Yanuya, na yanuyanu ni marau kei na lasa e na yatu Mamanuca.
E kaya o Baravilala ni gauna e ratou qai kele yani kina, sa osodrigi tu mai na matasawa vei ira na lewe ni vei yanuyanu ni saravanua ka ra gole yani me la�ki tavaki na i lakolako ni lagasere oqo e na vuku ni veivakatorocaketaki ni koronivuli na Yanuya Village School.
Kuria e na nona kaya ni ra kelekele ga mai na vei waqa ni vakalele mai na yatu Mamanuca, Yasawa kei na yatu Malolo e na nodra via la�ki tara sara ga na we ni vako, ka sega tale ni qai rogo i kurutaka tiko na domo kamica nei Lagani.
E kaya o Baravilala ni qai vitu na kaloko e na yakavi, era sa dabe vakanomodi e na nodra waraka tiko na Tui Lawa ka nodra vulagi dokai.
Na gauna ga e ra sa yaco mai kina na Tui Lawa, e ra sa dolava sara na soqo ni rogosere, oqo ka sa vakacagau vata talega yani na kena kumuni na soli.
Tomana o Baravilala ni kakadresudresu ga na i sulu ni fakawela kei na veivakaleleci vakaveiwekani ni sa katakata cake tikoga mai na soqo e na kamica ni domoi Lagani, kei na bulabula ni nodratou i vakatagi na Spinning Wheels Band mai Suva.
�Bula dina na soqo e dai, ka ratou lagata na matasere na Seni Viavia Kula mai Vuma e Ovalau,� e kaya.
Kuria ni lekaleka ga na bogi, baleta ni bogi tiko ni Vakarauwai, ka sa dua na ka na kena ca tiko vei ira na cauravou kei na goneyalewa ni Malolo, ia, e dreve ni lewai keda tu na gauna.
Tinia o Baravilala ni a cava na soqo e na bogi oya e na dua na delana cecere sara, ni ratou kila ni sa rawati vinaka na i naki ni sasaga ni koronivuli, ka ratou a sureti kina.
Vinaka vakalevu na veiqaravi cecere na Turaga na Tui Lawa kei ira na lewe ni nomuni Yavusa kei na komiti ni Yanuya Village School.
Sa koto oqo e ra na sere ni yatu Malolo ka a bulia o qasenivuli vakacegu Iliesa Baravilala, ka ratou lagata na Mana Bay Lagoon Serenaders, me i dolei lesu ni nodratou a la�ki qaravi voli tu mai na nodra vanua lomani na Tui Lawa.
Vakatulou saka ki na yavu vakaturaga
Mamanuca kei yatu Malolo mai seretaka
(Nodra vanua kai sakisaki) na Vuni Sa Levu na Tui Lawa
Solevu lei a nodra koro vakaturaga.
Malolo levu kei Malolo sewa dau cibitaki
Veiyatu yanuyanu era ciri veivolekati
(Ira na dau sara vanua) sa dau nodra i gadigadi
Mositi ira dre ko malolo e veiyakavi.
Sa kuruseti vuravura, taucoko
Isa Malolo, qori na kemu i rogorogo
(Kemu veiotela domoni) druka tu lei ka qoroqoro
Sa rauta mo dau mositi isa lei Malolo.
Waqa totoka ni sara vanua, veisiriyaki
Yatu Malolo sa rauta tu mo mai seretaki
(�U sa na lesu tu ki na Lagoon) ki Mana noqu i sakisaki
Yarolevu, Navitanive sa loloma yani
Ki na yavusa o Ketenimasi mai cibitaka
Taukei Nacavacolo� ni sa bula vinaka
(Taukei Nabukelevu) taukei Bua sa matata
Bula balavu saka na turaga na Tui Lawa�� (2)
Sa veisureti raraba tiko yani o qasenivuli vakacegu Iliesa Baravilala vei kemuni na turaga, marama kei kemuni na gone e na yasayasa vaka-Ra, me tekivu mai Tavua ka kauta vaka ki Nadroga, mo ni gole yani vakalewelevu e na i ka 31 ni siga (Moniti) ni vula ga oqo ki na Club 2000 mai na Siti ni suka mai Lautoka.
E na tavoci tiko e na vakacagicagi ni Diwali oqori na i matai ni nona katokatoni o Mosese Baledrokadroka, e dua na cauravou yabaki…. ka i otioti ni cauravou me vulica na nona sere o Baravilala.
E na tekivu tiko na rogosere e na 2 na kaloko me yacova na 5 e na yakavi oya.
E ratou na veitomani tale tikoga kina o Jale Mareau, Sabestian James kei na Veivueti ni Mudremudre kei Natabua.
Kuria o Baravilala ni na tauya $10 tiko na i sau ni dua na CD e na siga ga oya, na lutu sobu ni Diwali, ka $15 ni oti na Diwali.
Sa nuitaka ni ko ni na gole yani vakalewelevu mo ni la�ki marautaka na vakacagicagi ni Diwali e na Moniti mai oqo.
Ena qai tomani tale yani.
