EDA sega ni lewa rawa tu na bula, ka da sega ni kila e so na dredre e da na rawa ni sotava. E vuqa ni ra sa vakasukai mai ena nodra vanua ni cakacaka, e dua na leqa vakailavo levu era dau sotava ni se tu na nodra dinau ena baqe se sausaumi ni yaya vakadinau. Oqo e dua na dredre e sotavi ena veisiga e na nodra sasaga me sotavi na sausaumi.
E dua na dau nunu o Jesoni ka nodratou I nuinui na nona vuvale e sa mai sotava tiko oqo na dredre ni veika vakailavo kei na nodratou bula ena veisiga.
E rua tiko na nona akaude ni voli yaya vakadinau kei Carpenters Finance ena levu ni lavo e $1637.94. E sauma tiko e dua reito yaloyalo kei na teveli/ dabedabe ni kana ena dua na akaude e $74 ni dua na vula.
Na i karua ni akaude e a volia kina e dua na kato ni waililiwa ka sauma tiko e $72 ni dua na vula ka sa vo ga e $225.80 me saumi vakaoti.
E na gauna e dolava kina o Jesoni na nona akaude oqo vei Carpenters Finance e a se rawa ka vakailavo kina ena nona dau nunuva na sasalu ni waitui ka sa tiko na kabani e sa volitaka tiko kina na nonai voli.
E dau teitei tale tiko ga o Jesoni me veivuke vakailavo tale tiko ga vua.
E ka ni rarawa ni qai mai tauvimate o Jesoni ka sa sega ni rawa ni nunu ka mai tao talega na nona vurevure ni rawa ka vakailavo
E mai laurai vei Jesoni na mate ni yatevuso ka a vakasalataki vakavunivai me kakua mada ni nunu ena lomani tolu na vula me yacova nona laurai tale. E mai vakaroti vakavuniwai talega vua me vakacegu sara vakalevu ka me vakua na vakaitavi ena vakaukauwa yago.
E mai vakaraitaka talega o Jesoni kina Matabose ni vica na yabaki sa oti ni a curu tale tu ga ena valenibula levu na CWM e Suva ena mate e dau tarai ira na daununu ka vakatokai ena yacana vakaperetania na Bends.
Ena loma ni dredre oqo e goleva mai ki na Matabose o Jesoni me vukei na kena qaravi se manidiataki ni nona dinau.
Ena i ka 27 ni Epereli 2016, e mai kerea na Matabose vua na kabani ni voli iyaya vakadinau me veisautaki na veika me baleta na nona akaude ena yavu ni lawa ni dredre ni sausaumi ena Consumer Credit Act 1999, Tabana e 66 (2) (b).
E a vinakata o Jesoni na repayment holiday na kena soli tu na galala vua ka me 3 na vula me rawa ni vakacegu vinaka ka vaqara tale e dua na cakacaka vou.
E volavola lesu mai na kabani voli yaya vakadinau oqo ko Carpenters Finance ena i ka 3 n Me 2016 ka vakaiotaka mai na repayment holiday ka tolu na vula.
E ratou vakatikitikitaka talega na sausaumi ka a sa namaki mai vua ena i ka 30 ni Epereli 2016.
Na dauvolivoli ka ra sota kaya tiko eso na dredre era rawa ni kerea na kabani era vakarautaka na dinau me veisautaka na konataraki ni dinau ena ruku ni lawa na Consumer Credit Act 1999, Tabana e 66 (2) (b) ka kerea me :
(a) Vakalailaitaki na i wiliwili ni lavo e namaki me saumi mai vei iko ka vakabalavutaka na gauna e lavaki mai ena konataraki
(b) vakadaroya ena dua na tikini siga, kevaka e sa dodonu mo sa saumsaumi ena ruku ni konatraki
(c) vakabalavutaka na gauna ni nomu konataraki ka vakadaroya ena dua tale na tikinisiga ena gauna e sa dodonu mo sausaumi kina ena ruku ni konataraki
Era rawa ni sota kaya na dredre na dauvolivoli kevaka era tauvimate, vakacegui mai ena vanua ni cakacaka se tiko dina na vuna ka re sega ni sotava rawa kina na veika e namaki mai vua na kabani ni soli dinau ena ruku ni konataraki.
Ia, ko ira na dauvolivoli era sota kaya tiko na dredre mera guta vakusakusa na nodra veivosaki vata kaya kei ira na kabani e soli dinau.
E vinaka na yadrayadravaki kei na sasaga me bokoci na dinau.
E dola tale tu ga na veiqaravi ni Matabose ka vakatokai na Debt Management and Consumer Credit Advisory Services ka sega e dua nai lavo o sauma kina.
