ESA rai na mataboko e na wai ka drodro tiko e na yasa ni koro ko Natadradave ka lako talega na lokiloki. Oya na veika e vakaraitaka ko Savenaca Tamani e dua na turaga ni Natadrave mai Dawasamu.
?Na wai qo e vabula na vei mataqali mate kecega o ni kila rawa ni dau tauvi keda e na vuravura qo,? e kaya o Tamani.
E tukuna na turaga yabaki 65 qo ni ra lako sara tiko yani na veivanua e na yasayasa vakara me ra la?ki gunu ka sisili ena wai ka drodro sara tiko mai e na loma ni delana ko Nakaroni.
E kuria ko Tamani ni o ira kece na cika e na yasayasa e Dawasamu era mai tavoi e na wai qo, e vaka ga na cakacaka mana ka ni sa mai oti yani vakasauri na damudamu ni mata ka mai raramase tu yani na nodra rai.
?Sa dua na kalougata levu vakaitamera vei keimami ena yasayasa qo ni drodro tikiva tiko na neimami tikotiko e dua na wai ni veivakabulai vakaoqo,? e kaya o Tamani.
E vakadeitaka o Tamani ni sega walega ni dua na kena yaga ke veitalanoataki tiko ka vinaka mo na gole yani ka la?ki vakadinadinataka na cakacaka mana ni wai qo vei ira era sa vakabulai ira oti.
?Vei ira e tauvi ira tiko mai na mate ni kuli, era mai yali ga eke na mate ni kuli e ra kauta tu mai,? e kaya o Tamani.
A donuya na Nai Lalakai e dua na marama ka taubale mai Vorovoro me mai sili e na wai qo ka vakaraitaka ni sa mai rai vinaka yani ni oti e vica vata na yabaki na boko tu ni matana.
?Au sa bolea me?u dau taubale mai Vorovoro me?u na mai silima tiko na wai qo ka ni sa vakabulai au mai na noqu mata boko,? e kaya ko Kaliti Tinai.
E tukuna ko Tinai na marama ni Bucalevu qo ni sa vakila ni sa rawa talega ni rai sara vakayawa na matana ni oti na nona mai sisili tiko ka tavoi e na wai qo e Natadradave.
?E liu e buwawa sara tu ga na noqu rai, ia na gauna qo esa sega tale ni qai yaga vei au na matai iloilo ka ni sa makare tale tu na mataqu,? e kaya na marama yabaki 73 qo.
