SA dua na vakatulewa vinaka e vakayacora na dau ni veivakatavulici ni timi ni Viti o Ben Ryan e na nona ciqomi ratou na noda cauravou ka ra sa qito tiko mai valagi e na gauna oqo.
Oqori na nona i vakamacala o Talatala Joji Rinakama, na dau ni veivakatavulici ni timi ni Nairtasiri e na gauna oqo.
E vakamacalataka Rinakama ni gauna oqo edodonu me da sa rai vakayalomatua, ka rawa ni vakadinadinataka e na nodra sa saga na vo ni timi ni vuravura me ra kovea na vanua eda dau vakadomobula kina na timi ni Viti.
Kuria o Rinakama ni vu ni nodratou druka vei Kenya e na qito mai Singapore, baleta sara ga ni ratou sa vakayagataka tale na timi ni Kenya na nodratou qitoqito na noda cauravou.
Oya na kena rawati tale mai na polo e na i matai ni caqe, na kena vakasavasavasataki mai na polo ki muri kei na kaukauwa ni nodratou veivesu.
?O au madaga, au vinakata sara tikoga me rau kau lesu tale mai o Nakarawa vata kei Nayacalevu,? e kaya.
Ia, oqo talega edua na vanua me ratou na vakaraitaki ratou kina na gole mai valagi, e na totolo ni qito e tiko vei ratou, se na ka e ratrou rawa ni vakayacora e na loma ni vitu na miniti.
E kaya o Rinakama ni malumalu eda raica vei ratou na noda toa ni vala e na sota kei Kenya, sa i koya na kedra i bulibuli.
Tomana ni o ratou na timi ni Kenya e ratou sa biuta sara ga mai na nodratou tamata totolo, qai balabalavu e na sota kei Viti.
?Ia, ni sa tiko tale oqo ko Nakarawa e na via duatani tale na veivosaki, ka ni ra sa qai sota vakatuwawa,? e kaya.
Kuria o Rinakama ni o keda na kai Viti me da kakua ni leqataka vakalevu kevaka e ratou sega ni qito vata tu mai e na dua na gauna balavu.
Na gauna ga e ratou na mai tereni vata kina e na dua na macawa, oya e vaka ga na mekaneti na kena veireguci na nodra qito, ka vakakina na veimositi kei na voravora ni qito e ratou na la?ki vakayacora e rara. E kaya o Rinakama ni vakabauta ni gauna oqo e sa na vakasalataka tiko vei ratou o Ryan na rua na qito dredre e sa tu oqo e matadratou, ka vakabibi na i golegole ki Rio e na vula ko Okosita.
Sa tu na nona vakanuinui o Rinakama ni dua na sara qito vinaka e ratou na vakayacora na noda cauravou.
Nai matai ga ni nodratou qito na noda cauravou e ratou na sota tiko kina kei na matatimi ni Sikoteladi e na mataka lailai ni siga Vakarauwai ni sivi toka na 5 e na 44 na miniti, na i karua ni qito e rau na veitavulaki kina kei na timi ni Welesi ni sivi na 9 e na 14 na miniti e na bogi ni Vakarauwai, kai otioti ni nodratou qito vakatobu e rau na calidi kina kei na timi ni Samoa ni oti na 12 e na 47 na miniti e na mataka lailai ni Siga Tabu.1
