ENA veimataqali talanoa ka dau rogo mai e na veiyasana duidui e na noda vanua lomani oqo ko Viti, e yaco tu na kena i vakatakilakila ka drodrova sobu mai na noda kawa me tekivu mai vei ira na tubuda vaka-vica, ka yacovi keda sara mai na bula tiko e na gauna e daidai.
Sa vuqa sara nai i tukuni, se i talanoa, baleti ira na keda i susu e da dau rogoca mai vei ira na noda qase, e so, e veivakurabuitaki, e so e vakarisiate ni da vakarogoca, e so e lasa ka so e sega ni lasa.
Ia, e na macawa oqo e da sa na rogoca mada kina na kena i talanoa o Toroki na nodratou Vu na koro ko Qelekuro ka vakarurugi koto e na Yavusa Dere mai na vualiku kei Tailevu ni siga.
Ena siga Lotulevu ni macawa sa oti e ya gole kina na Na i Lalakai, e na koro vakaturaga o Qelekuro, me laki vakasokumuna mai na i talanoa nei Toroki e na veika lelevu e dau vakayacora e na gauna oya, ka vakavuna me sega ni vakagauna na bula ni tivoli e na nodratou vei korokoro me tekivu mai na koro ko Lawaki, ka vakamuria cake na bati ni wai kei na kena loma ni vanua.
E vakavinavinaka talega vakalevu na nomuni veva na Na i Lalakai vei turaga ni koro kei na vica na turaga ni vanua kei na marama , e na nodratou veiciqomi e na kena la?ki tovolei na yaqona kamica kei na i talanoa rogorogo vinaka baleti Toroki na nodratou Vu ka vakayacori toka e na nodratou loma ni koro.
Taumada na nona vakamacalataka o Asia Raicabecabe na turaga yabaki 64 mai na koro ko Nabau, ni nodratou Vu o Toroki e dua na turaga lasalasa toka.
So na nona i vakarau, e viavia tautauvata na sonaua, e so e viavia vaka tale tu na veli, ka so e lasa sara ga ni da vakarogoca, e kaya.
Kuria o Raicabecabe ni nodratou Vu e dau matau vua na vakacocoka voli e na nodratou baravi, ka taubale taka cake talega na nodratou veidelana qai laki vakacagicagi sara toka mai cake, ka qai vakasarava tu na vei yanuyanu e na yatu Lomai Viti.
E vakaraitaka o Raicabecabe ni so na ka e bau vuku toka kina o Toroki, sa i koya na nona vakawabokotaka na i tei ni belesukau e na nona vanua, baleta me kakua ni dau vakayadrati koya e na nodra dau lakova na marama e na veimataka.
Tomana o Raicabecabe ni a qai vakawataka o Toroki na Tivoli e na nona vanua me ra kakua kina ni via kana na nona kawa ka yacova tu mai na gauna oqo.
Na Tivoli ka bula tu oqo e na neitou vanua e sega vakadua ni bau oti rawa mai na gauna oya, me yacova mai na gauna oqo, e kaya.
Kuria na nona i talanoa o Raicabecabe ni dua na siga e a taubale cake tu o Toroki e na nona lesu mai na cocoka i waitui, rau qai sota vata kei Talusi na nodratou Vu na turaga ni Naqele, ka sa qai tukuna vua o Toroki me vagolea mai na wai ki Qelekuro.
Oti sa qai kaya vua ko Talusi ni kevaka e vinakata me vagolei na wai ki Qelekuro, ia, me rau valataka.
Sa donu, mataka daru mai sota e na delana qo e matailawa, me daru vala kina, kevaka o sa qaqa sa na gole na wai ki Lawaki, ia, kevaka au na qaqa, e sa na vagolei na wai ki Qelekuro, kaya o Raicabecabe.
Kuria o Raqicabecabe ni sa qai vakaiyaragi mai o Talusi e na voto ni ura, ka vakayaragi yani ena voto ni vadra o Toroki.
Nodrau tekivu vala ga sa druka tale o Toroki baleta ni momoto vinaka toka na voto ni ura ka kauta mai o Talusi.
E kaya o Raicabecabe ni levu sara na i talanoa ni nodratou Vu e bau lasa toka me vaka na nona laki tea na vudi e na i yala ni mati.
Au vakabauta kevaka e tea na vuna e na cadra tu beka me yacova mai na gauna oqo, e kuria.
Tomana ni dua tale na gauna e a suaka e 5 na daseni niu mai tawana yani e na dua na taga, ka taubale sara ki nakoro, na gauna saraga e taubale tiko kina vaqo, qai rorogo tiko na wai ni niu.
Tu ga vakadua o Toroki kei na nona kaya yani,O kemuni na i lala niu oqo, o ni kakasetaki au tiko
E kaya o Raicabecabe ni taura ga na niu o Toroki, qai vorovorolaka me ra lakotani kece na kena wai, qai mai lave vinaka tale yani ka kauta sara ki nakoro.
Kuria na nona i talanoa o Raicabecabe ni so na siga e dau veisau na nona parokaramu ni nona taubale ena nona baravi, oya ni oti na taubale e qai dau dua na cegu lekaleka, vakayagataka na kena i katalau ni bera ni qai dau laki moce toka e na dua na vunikau e matasawa me rawa ni ceguva tu kina na cagi bulabula mai waitui.
Tomana o Raicabecabe ni dua na siga ni mai dadavo toka o Toroki e na ruku ni vunikau oya, ka vakarau lutu sara ga na nona moce, sa rogoca sara e dua na domo ni lagalaga sere ka qai rai yani vaqo, qai raica e dua na goneyalewa ni laga sere welewelei toka ka mai vari ika no yani, e na vanua sara ga e davo toka mai kina o Toroki.
E vaka ga e rideu e dua na vusi tagine o Toroki ni sega madaga ni bau tavidi e dua na taba ni kau, e na nona sa vakawadravi koya na goneyalewa ka vari ika toka oya.
Kaya o Raicabecabe ni sa qai toso yani vakamalua o Toroki, dabe toka ga e na veinuku me kakua ni raici koya o goneyalewa, sa qai dodoka yani vakamalua na nona tivoli.
Na kena toso tu yani na tivoli oqo e curubotea na tadevo, me yacova sara na tepi.
E kaya o Raicabecabe ni gauna e sa yacova kina na tepi na tivoli oya, e voleka me sega ni laurai e dua na lewe ni ika, ni sa vuki vari, se baci vuki tale, me vari ni sa qai vaka e malemaleka tikoga mai vei koya na goneyalewa oya na vari ika e na vanua e tekiduru tiko kina.
Tomana o Raicabecabe ni gauna e sa yaco yani kina i vale o goneyalewa, ratou sa tarogi koya sara se cava e leqa, ni vaka e wawale na kena i rairai.
Sa qai tukuna yani o koya kevaka e se vo tale na ika, me na qai laki varia ga mai o koya e na siga ka tarava.
Vakaraitaka o Raicabecabe ni oya gona eso na mataqali i vakarau, e vakayacora o Toroki e na gauna oya, ka se tu ga na kena i vakadinadina bula me yacova mai na siga ni kua.
