RAUTA ni $3.6 na bilioni na levu kece ni lavo ena vakayagataka na matanitu me na cicivaki kina na nona veiqaravi ena yabaki vou vakailavo oqo.
Mai na i lavo oqori, e $2.1 na bilioni ena saumi kina na cicivaki ni matanitu me vaka na kedra i sau na tamata cakacaka kei na gacagaca ni veiqaravi e na veivalenivolavola.
Ka $1.4 na bilioni esa biuta tiko vakatikitiki na matanitu ena cakacaka levu ni veivakatoroicaketaki e Viti.
Ni sa biuta vakaoya na matanitu na nona i tuvatuva vakailavo, na tabana ni vakacavacava kei na kasitaba e sa virikotori vei ratou na takete me ratou na kauta mai ki na matanitu e $2.9 na bilioni.
Na $620 na milioni e sa na qai kere dinau na matanitu e na veitabana eso e Viti kei na kena mai valagi.
E vica vata na vanua esa na kere dinau mai kina na matanitu me vaka na Baqe kei Vuravura, kei na Baqe ni Veivakatoroicaketaki mai Esia.
Ena tiko ena $329 na milioni na levu kece ni lavo ena dinau mai kina na matanitu vei rau na baqe oqo mai vanuatani.
Sa vakarautaka talega na baqe e rua oqo e $100 na milioni na i lavo ni Mereke me na vukei Viti ena veivakacokotaki e qaravi tiko oqo ni oti na cagilaba o Winston.
Na kena vakatoroicaketaki na wai ni gunu ena tiko ena $5 na milioni, ka ratou na vakarautaka mai oqo na Baqe ni Veivakatoroicaketaki mai Esia.
E namaki me na sauma lesu tale na matanitu e $152 na milioni ena sausaumi lesu ni dinau.
