ERA sa nanamaki tiko na i tabagone mai na i tikotiko e Lepanoni, Vunibuabua kei Wainiyabia ena vuli ka ratou cicivaka tiko na Minisitiri ni Tabagone.
E namaki me na cava na vuli e veiqaravi tiko kina qo na minisitiri ena Vakaraubuka oqo.
E dua na turaga yabaki 36 o Osivati Leva Labukia e sa vakacavara mai na nona totogi e loma ni valeniveivesu ena vuku ni nona teivaka na waigaga ni veivakamatenitaki e Kadavu ena 2011.
Ena nona suka mai oqo ka sa vula ciwa na nona sa tomana tiko na nona bula, e sa guta ga vakalevu o Labukia na teitei.
E sa mai volitaka tale o Labukia na meleni ka tea tu ka sa vakila tiko na vinaka ni cakacaka vakaukauwa kei na vakayagataki qele. E na gauna oqo e sa makutu tiko na qarava na nona i teitei ni kakana draudrau kei na kakana dina o Labukia.
” Au tei dalo, na tavioka kei na kakana draudrau,” e kuria.
Ia, e na gauna era na vuli tiko kina na i tabagone ena i tikotiko oqo ena loma ni macawa oqo, esa volia tale na minisitiri ni tabagone na kakana ga ka tea oqo o Labukia, ka kauta mai na nona i naki ena vuli vata ga vakaoqo ka vulica ena nona tiko voli mai loma ni valeniveivesu.
E a vulica taumada o Labukia na vuli ni veiliutaki kei na nomu kilai iko vakataki iko ena nona vuli ena veiqaravi ni Minisitiri ni Tabagone.
E kaya ni gauna oqo e sa vulica talega na i walewale ni kena tuvani ka vakayagataki vakavinaka na i lavo kei na kena tuvani na i tuvatuva ni vakacicivaki bisinisi.
Vakadeitaka na ivakailesilesi liu ni Minisitiri ni Tabagone, o Iowane Soko ni vuli oqo e sala muria tikoga na i matai ni vuli ka vakayacori ena itikotiko qo mai Lepanoni ka vakayacori ena vula o Me.
E namaki mera sa na yadua na akaude na lewe ni soqosoqo ni tabagone oqo ka veivuke kina na baqe na BSP, ka ra na laki vosa talega ena vuli oqo na minisitiri ni bula, tabana ni cakacaka na NEC kei na tabana ni teitei kei na Minisitiri ni Qoliqoli.