Update: 10:26AM SA MAI yala toka na noda i talanoa e na gauna era sa vakawadravi rau tiko kina na yalewa tevoro, e na totoka ni kedrau i rairai, na turaga ni Tukavesi.
Ni tei wiliwili sara yani:
E viavia 15 na miniti na nodra veiwadravi tu ka sega ni dua e bau vosa se me sauriva, e na nodra sa vakaraici rau cake, vakaraici rau sobu, se baci vakaraici rau cake na yalewa e na totoka ni kedrau i rairai.
Vuka vakadua na wawale ni kelikeli, ni ra sa raici rau tu na dau butakoca tiko na kedra vudi ni koro na turaga ni Tukavesi.
E kaya o Luke ni gauna e ra sa veirai tu kina e na matana votu, rau sa qai solia na veimataqali vakatutusa se cavuta na nodrau i soro na yalewa tevoro me vaka koto oqo; keirau na Kalou ni nomuni i lavo, keirau na solia vei kemuni na i solisoli me ra vuku na nomuni kawa, keirau na dau karoni kemuni e na gauna o ni takosova kina na wasawasa titobu, kei na veimataqali ulubale e rau vakacavuta.
Tomana ni kurea tu ga na uluna e na nona sega ni vakadonuya na nodrau vakatutusa o ya na nodratou i liuliu ni yavusa.
Kuria e na nona kaya ni dede vakalailai e rau sa qai kaya na yalewa tevoro me rau sa na dau qarava na vanua, na ka ga e leqa kina na vanua, me rau na veivuke kina.
Na leqa cava ga, leqa lelevu, leqa lailai, se mani vakacava na kena drakidrakita, e rau sa na veivuke kina.
�Sa donu! O drau sa na bula sara ga nikua, e na i ulubale o drau solia mai qori,� kaya o Luke.
Tomana ni rau sa qai vesu na yalewa e rua qo, e vesu vata na ligadrau, vesu vata na yavadrau, sa qai ciqimaki kina me rau yadua na kau, ka rau vakaivuataki, me vaka e vesu e dua na vuaka ni veikau.
Kuria o Luke ni gauna e rau sa kau kina ki nakoro, e sa qai vakatokai ga na yacadrau me dua o tinai domodomo vinaka, ka dua o tinai domodomo ca.
�Au qai mai rogoca na yacadrau e na gauna au sa yabaki ciwa tiko kina, baleta na noqu mai rogoca oqo, e na yasana vei tinaqu me mai noqu Nau dina kina e dua vei rau na yalewa tevoro, baleta ni o koya e vakawati sara ga e na matavuvale nei tinaqu.
Ena qai tomani tale yani
