ESA mai kacivi tale ena macawa sa oti na nona bula e dua na dauqito ka matataka tu e liu na timi ni Viti, ko Tomasi Rabaka mai Vuniyasi, Nadi
.
O Rabaka e dau qito ena i tutu ni naba 10, ka cavutu mai na koro o Waikete, Tailevu ka dau nanumi vakalevu ena nona a vakota e rua na i caqe vakatubutubu (drop goal) ena sota kei Romania ena 1991.
E tukuna o Samisoni Rabaka na tacina ka dau ‘half back’ tu e liu ni timi ni Viti ni a caqeta o Tomasi nai matai ni caqe vakatubutubu ena veimama ni rara.
E kuria o Samisoni ni i karua ni caqe e a laiva o Tomasi a caqeta ena 10 na mita. E kaya ni o Tomasi e dau taura vakabibi na rakavi ka sega ni dau taleitaka na druka ka sega talega ni dau vakanuinui kina dua tale na dauqito. E dau cata na soli i ulubale ka sega ni dau sorosoro rawarawa ka dau yalo dina na nona vakaitavi ena ka kecega.
E tukuna o Samisoni ni a vakamuria na veika e dau cakava o Tomasi ka ni a tuakana ka sa na vakananuma tu na nona sa mai yali.
O Tomasi e i ka va ni gone ena nodratou vuvale lewe tinikadua. E tukuna na marama watina ko Ana ni o Tomasi e dau kauwaitaka na nona vuvale.
E kaya ni vei na vanua e tu kina o Tomasi, ni sa nanuma na nona vuvale esa na gole saraga kina vakadodonu me rawa ni raica ni ra marau tiko ena veigauna kece.
A tekivu na qito nei Tomasi ena timi ni St Mary mai Nadi ni bera ni qai la’ki qito ena timi ni Brothers mai Votualevu. A lewena na timi ni tinikalima ni viti ena Qito ni Vuravura ni 1991, ka timi ni Nadi Cavaliers ena 1992.
A mai cegu na nona qito rakavi ena 1993 ni sa qai yabaki 27 ena nona a mavoa vakacalaka ena nona laucoqa ena lori.
A mai takali o Rabaka ni sa qai yabaki 51 ni oti e dua na tauvimate balavu ka se bula tiko na marama watina ko Ana kei na vitu na luvena, rua na makubuna.
