E SA tabu ni dua na i talatala me na qai vakatavako tiko ka sa yalani na gauna ni gunu yaqona, kaya na Vunivola Levu ni Lotu Wesele e Viti kei Rotuma Talatala Doketa Epineri Vakadewavosa.
Ka sa vakadeitaki oti ena Bose ko Viti sa oti ni dodonu me na yaco ga ena veimama na 10 na bogi na gunu yaqona vei ira na i Talatala kei ira era veiqaravi ena cakacaka vakalotu.
?Esa vakabibitaki tiko oqo, baleta na kena tu tale na i tavi me na qaravi ena siga e tarava.
?Ena kena gadrevi me cakacakataki na gauna, ka vukei ira talega na lewenilotu me ra lewenivanua bulabula ka me ra kua ni vakalusia na nodra gauna ena gunuvi vakasivia ni yaqona.
Na i ulutaga oqo e sa dau veivosakitaki vakavuqa ena bose vulavou, kei na Bose ko Viti.
Na veika oqo e sema talega ki na Yavu ni Bula Vakaivakarau me sa na vakamuria yani oqo na lotu ena yabaki vou.
?Na Yavu oqo se na Code of Conduct e yavutaki kece mai ena i Vola Tabu ka yavu ni bula va- Karisito.
?Esa vinakati tiko na bula ni lewe ni lotu me ra bula vakaivakarau ka cakacakataki ira mera turaga se marama bula yaga ena dela ni nodra veiqaravi,? e kaya o Talatala Vakadewavosa.
?Kevaka e dua e sa gunu yaqona tiko mai na 5 na yakavi ki na (3) tolu na kaloko e na mataka lailai e tarava, e sa sega toka ni vinaka.
?Esa biu tikoga yani na i vakaro oqo, ka sa tiko na vakanuinui ni ra na muria vakavinaka na lewenilotu,? e kaya o Talatala Vakadewavosa.
Ena yabaki rua sa oti, ena gauna se bula kina na Qase Levu vakacegu, Talatala Tuikilakila Waqairatu e sa mai vakabibitaka saraga na bula vakaivakarau ka me kua ni lewai ira tu na lewenilotu, vakauasivi vei ira na i Talatala na gunu yaqona vakasivia.
A biuta kina e dua na vakatulewa kaukauwa, ni na vakadaberi o ira kece na i talatala se cakacaka vakalotu e laurai vei ira ni ra sa vakasausataka na gunuvi ni yaqona.
E vakadeitaka talega mai ki na Nai Lalakai o Talatala Vakadewavosa ni sa vakadeitaki ni sa tabu na gunu yaqona kei na vakatavako ena loma ni bai ni Talatala.