NODA Railesu e na macawa oqo eda na wilika kina na nodra soqo vakayabaki na Girl Guides e na noda Koro lesu o Suva.
Ni tei wilika sara na i tukutuku e tabaki koto kina e na yabaki 1963:
E na yakavi ni siga Vakarauwai sa oti e a vakayacori kina e Suva na nodra soqo levu vakayabaki na Brownies, Girl Guides, Cadets kei na Rangers e na i wasewase levu o Suva me tekivu sara mai Vutia, Rewa ka yaco ki Mau, Navua kei Nakaulevu ka okati kece kina na koro levu ko Suva kei na veivanua kece ka volekati Suva.
Era a tiko vata e na siga koya e sivia e lewe dua na udolu na lewe ni soqosoqo kece e na dua na yakavi rugurugua vinaka ka ra a veitalatala talega kina vua na marama watini Kovana (Lady Maddocks) o koya ka taura tu e dua na i tutu cecere e na i soqosoqo ni Girl Guides e na noda vanua.
E na veimama ni dua na kaloko e na yakavi ko ya era la?ki tuvani tu kina e na daku ni maqe ni Sauca Welesi ko ira na Girl Guides, na Cadets kei na Rangers me ra yabeta mai na gaunisala na Victoria Parade me yaco yani ki na rara na Grammar School makawa ka ra a veisisivi kina na veikabani ki Guides , Cadets kei na Rangers ni a tauri tiko na nodra i vukivuki mai vei iratou na kena turaganilewa ko Captain A L Masi, Lt Ratu Epeli Nailatikau, Lt Ratu Aca Soqosoqo kei Lt Iferemi Tamanivalu.
E ratou a digitaki mai na noda i tikotiko ni Mataivalu me vakatulewa e na nodra i vukivuki ni yabe na gone yalewa ka a liutaki ira tiko mai ko Commissioner Fugawai Boila ka vukei ira tiko mai na dramu me vakadodonutaka, ka vakabulabulataka mai na i lakolako e gaunisala.
Era vakaitavie na veisisivi yabe oqori e 30 na kabani ni Girl Guides ra lewe 30 na Cadets, ka rauta e 40 na Rangers.
Ko ira na gone yalewa lalai na Brownies era a sega ni vakaitavi e na yabe e gaunisala ka ni ra a soqoni vata e rara ka ra vakarokoroko kina vua na Colony Commissioner ko Mrs J Barnes kei Lady Maddocks.
Era a yabe yani na gone yalewa ka yaco sara yani ki loma ni rara mai na Grammer School makawa ka ratoui sa tucake tu mai kina na i Liuliu Levu ni Girl Guides kei na Brownies e Viti ko Commissioner J Barnes, Miss Anne Williams na Divisional Commissioner, Tulia Koroi na i Vukevuke ni Divisional Commissioner, Mrs D Brown na Commissioner e na i Wasewase e Loma kei nona i Vukevuke ko Commissioner natoma Cavuilati, ko Commissioner Paulini Blakelock vei ira na Brownies ka vaka kina ko ira e so era digitaki mai na i Soqosoqo ni Boys Scouts e Viti.
Era a yaco yani ki rara na Girls Guides ka ra la?ki salutu na i liuliu ni vei kabani e na nodra lako wavokita na vanua eratou tucake tu mai kina na i liuliu ka ra la?ki yatuni ka tu vakadua ni a veivakilaitaki ira ko Miss Williams kei koya na nodra Colony Commissioner vou ko Mrs J Barnes.