Na koro ko Nalidi e dabe toka ena ruku ni veitokaitua kei Uluivuda ena loma ni yasana o Ra volekata na koro ko Natuvatuvavatu ena yasana o Tailevu ka wasei rau ga e dua na kelikeli.
E dabe toka na koro oqo ena bucabuca ka muria na wai na yasa ni koro ka veikau wavoki na kena veidelana kei na kena veico drokadroka ka ubia tu yani na veibaba vatu sule ka ra se bera sara ni kila na tiko voli e kea na veika e vavani tu kina.
Ena kena tovolei me butuki ko Nalidi, ena muria na gaunisala ni Tui (Kings highway) oya na gaunisala levu ka davo tikiva na uciwai rogo na Wainibuka ni biu yani na taoni lailai o Korovou ni se bera na koro ko Nayavu sa gole na gaunisala ki na imatau na gaunisala cake ki Nasaibitu.
Mai Nasaibitu e vakadodonu cake ga na sala me yaco sara ki na koro ko Nalidi.
A veisiko na Na iLalakai ki na koro ko Nalidi ena vuku ni kena gadrevi me la’ki curumi na qara ko Nalari ka se qai kunea walega na kena i curucuru ko Peni Kedremau e dua na dauteitei yabaki 20.
Vei kemuni ni se bera ni kilai Nalidi, e volekata na veidelana ka ra se tauyavu makawa kina na tubuda ni se bera ni tawani ko Nakauvadra me vaka eda sa kila tu nikua.
Ko ira na lewei Nalidi era a kawa mai vakadodonu vei ira na qase ka ra se tawani Nakorowaiwai na koro makawa ena loma ni delana ko Uluivuda ena drau na yabaki sa oti.
E dua na ka era duatani kina na lewei Nalidi ena nodra ivakarau vinaka, dauveikauwaitaki ka ra dauveirokovi.
Era maroroya tudei na nodra vakabauta kei na nodra itovo vakanua ena nodra dau kauwaitaki na vulagi ena nodra loma ni koro.
E malua no na nodra ivakarau ni bula ia era dei tikoga ena veika vakavanua era se bulataka mai na nodra qase e dua na kenai vakaraitaki na nodra dau sevu ni vanua ka ra dau sevu i liu na yavusa bete ni bera ni qai sevu na lotu kei na vuqa tale.
Me vaka ni curumi tu na loma ni vanua vakaturaga oqo ena vula i Nuqa levu, e lako vata tu na kena draki uca kei na siga katakata ia e kalougata na vanua turaga oqo ni ra sautu tu ena sasalu ni waidroka kei na kena kakana draudrau ena dela ni vanua.
Biu na matasawa ena i tikotiko o Bure ena koro ko Gusuisavu me muri sobu na Sawani Serea ka semata yani na gaunisala ni Raluve me yaco ki na taoni e Nausori ni oti na kena takosovi na uciwai na Wailevu ka sa Rewa tiko nikua na yacana.
Butuki yani nai lago ni vanua o Navautaba ni sa karobo toka na vanua me cabo na i sevusevu me vaka na kena i vakarau ni oti na nona wawa voli mai o Lewa Ura kei na marama watina ena veitavaki.
Veisemati na vanua veiwekani ka ucu nai golegole ki loma ni vatunuloa me cabori nai lakolako ia, e ciqomi vakaturaga mai ena vanua ka sa i vakadinadina talega ni sa dola na ka kece ka sa i taukei talega ena gauna vata saraga oya.
Mai tekivutaki me sereki vakamalua na noke ni tukutuku mai na yavutu ena vuku ni veika gadrevi me tabaki ka volai na kena itukutuku.
Semati na veiwekani ena wai ni vanua vei ratou nai tokani kei ira na mai veisiko ka mai bukui talega e dua nai sema kaukauwa ka lako vata kei na veisamei.
A vakatarogi e tolu na turaga ka ratou a bau kilai Nakorowaiwai na koro makawa ka ni ratou a se gone lailai mai kina ni bera na toki sobu mai ki Nalidi.
E na gauna esa mai vakamacala kina ko Peni na dauteitei ena nona curuma na qara ena matai ni gauna e duidui na veika e tusanaka kei na veika e qai laurai ena loma ni qara ena gauna e qai curumi kina.
Ni qai kida na mataka ni Tusiti sa tekivu na vakasosolo me sa tovolei me cabeti na veidelana kei Uluivuda ena kena sagai me butuki na qara.
E dina ni dua na i wase levu ni lewenivanua volekati Nalidi era sa sasaga talega mera la’ki vakadinadinataka na rairai ni vanua kei na veika e tu ena loma ni qara.
Na kabukabu ni mataka oya e tara vinaka na yago ka ni se bera ni cabe na matanisiga me lewa na lako.
Era veikau na cauravou kei na vica toka na kena goneyalewa ka liutaka toka nai lakolako qo ko Luke Koro na turaganikoro ka ni sa buta vinaka tale tikoga ena veitokaitua kei Nakorowaiwai.
E dina ni levu vei ira na cauravou era lako tiko era kila ga na qara, na koro makawa ka ra sega ni kila na veitukutuku makawa dina eso me baleta na vanua qo se ko Nawaitoba ena nodra gauna na tubuda. Ia, e tiko yadua sara era sa bau rogoca cacavukavuka toka ka ra maroroya tu na kena i tukutuku.
E taura e rua na auwa na kena sagai me yacovi na delana ko Nakorowaiwai ni bera ni qai sagai yani na kena sirovi na veiqakilo me butuki na qara.
E dua dina na kalougata levu ni ra bula tu na vuata ka drodro tu na kena uciwai me veivuke ena vakamalumu tu ni tosotoso qo.
Sa mani vakayagataki na i titoko me veivuke ena kena sirovi sobu na qakilo ka ni sa rui sisisi sivia ena vuku ni taubi ni uca ka tara toka na vanua ena dua na gauna balavu.
Na tamosa ni veitalanoa ena loma ni veikau ka lako vata na veidredrevaki ni viavia dredre toka na siro ni ra waraki au toka me’u yaco sobu yani ki na vanua e vakababatoka mai kina na gusu ni qara.
Mani dua na cegu vakalailai ka qai curumi na gusu ni qara. Keimami yadua toka na cina livaliva kei na tavaya wai.
Ena gauna au butuka yani kina na buturara ni qara, e vaka saraga eda taubale tu ena dela ni cakau ka ni tautauvata vinaka saraga na kena i rairai ka sega na kena duidui.
Na veika ga eda raica mai cakau eda raica ena loma ni qara oqo ia ena dredre na noda vakabauta ka ni yawa sara mai waitui na qara qo ka ni tu ena dua na loma ni delana. Ia, era sa kila tikoga eso na tukutuku dina baleta na qara oqo kei na gauna a tawani taumada kina.
Na veivatu talega e kunei ena loma ni qara qo esa duatani sara na kedra roka me vakatauvatani ki na qara eso au sa curuma oti.
E levu talega na basoga ni qara qo ia era yawa sara ki loma ka rawa sara ni veivakasesei talega.
E laurai talega na qara ka tu kina na nodra vanua ni vakasaqa kei na kena kuro ka sa kakavorovoro tu oya na kuro ni Viti.
Na qa ni sici era dau kania e bini voli e kea kei na sue vatu ka ra dau vakayagataka.
Na vovo ni vuru se na bitu, bawara ka ra dau vakawaqaca me nodra cina e loma ni qara esa maka esa laurai vinaka tu ga ena loma ni qara na kena ivovo ni ra bini tu kina kei na maka ni qilaiso ena baba ni vatu ena loma ni qara.
Na wai batabata era turuturu tu e loma ka sa duatani sara na kena batabata.
E dua na qara e curumi e laurai tu e loma ni dabedabe ka sa taliva wale tu ga.
