SA MAI yala toka na noda i talanoa e na gauna e waraki tinai Sera tiko kina o nona daulomani e na nodra lako ki vakacakau kei ira na marama ni Tukavesi.
Ni tei wiliwili sara yani:
Na gauna sara ga e se tubu tu kina na nona dra o tamai Sera kei na nona quruquruta tiko na batina e na levu ni nona rarawa, sa raica sara na yadrei nona rosi ni sa basika cake mai e matasawa.
?O tu soti mai vei e na gauna taucoko qo? sa lai dromu tale mai qo na matanisiga o sa qai yaco tu mai.
?Raica mada na kena lailai na ika o rawata mai, baci levu ga o sa kania droka tiko mai wai.
?O sega sara ga ni bau nanumi keirau na veitamani ni keirau sa walokakai tiko e na levu ni neirau via kana.
?Vakatotolo mai mo mai rakuta na dei Sera e tiko qori e loma ni vale, vakatotolo tiko ni bera niu rubilaka i kesumu e dua na i vacu, ?e kurauti watina yani o tamai Sera.?
Ia, o tinai Sera e sega vakadua ni vosa, e curu cuvacucuva ga yani e loma ni vale kei na tuturu ni wai ni matana e na levu ni vosavosa e vuka mai o ya ni vaka ga e ra kabuwacara mai loma ni qara e dua na i binibini beka vakaitamera.
Na nona curu tu ga yani o tinai Sera e sa la?ki ravita sara tu na bou ni nodratou vale, ka vakaraici watina mai ni vosavosa ka rai tiko ga ki tautuba.
Na kaukauwa ni nona katakata o tamai Sera kei na nona vosavosa e qai kidava ga ni sa vaka e vagagalu mai vakasauri na loma ni vale.
Nona qai rai vuki yani sa raici tinai Sera ni sa ravita tu na bou ni nodratou vale ka vakaraitaka mai vua na ligana ruarua kei na nona kaya mai vaqo ri ne: ?Sa raica na liga qo? qo e sega ni liga ni raku da, qai susugi Sera vinaka tiko mai, au sa lako?.
E kaya o Luke ni gauna ga e vosa oti kina o tinai Sera, sa tekivu talega me curu na i qaqalo ni yavana e na loma ni qele, ka toso sobu tiko vakamalua.
Kuria ni qai cici yani o tamai Sera kei na nona saga me dreti koya cake tale mai, sa bera ka ni sa vaka ga e dromu tiko e loma ni dua na uciwai maravu o nona dau lomani.
?Isa na watiqu au veiwali tikoga, yalovinaka sara mo lesu tale mai.
?Sa na qai vakaloloma o Sera ni sa na sega na tinana, yalovinaka mo kua ni biuti keirau.
?Au sa yalataka qo e matamu niu na sega tale ni qai cudruvi iko tale vakadua,? e tagilagalaga taka toka o tamai Sera, kei na nona sa saga sara vakaukauwa me dreti tinai Sera tale mai ki cake.
E kaya o Luke ni dreve kece na nona sasaga o tamai Sera ka ni sa toso sobu tikoga i loma ni qele ka sega tale ni qai tao.
Tomana ni gauna e yali kina o tinai Sera e na loma ni qele, e sega tale ni bau laurai madaga e dua na qara me tadola tale tu, ka ni sa tasogo na qele me vaka ga e sega ni yaco kina e dua na ka.
?Na gauna o ya keimami sa qai vakabauta kina ni sa tevoro dina ga o tinai Sera e na nona sa dromu sobu e na loma ni qele, ka sega ni bau laurai tale e dua na qara lailai,? kaya o Luke.
Kuria ni sa qai vakamatea o nona Tata e dua na tamani bulumakau vakaitamera me i burua kei tinai Sera.
Tomana ni dede talega vakalailai sa malumalumu tikoga mai o Sera, ka sa mai kacivi talega na nona bula, ka sega tale ni qai dua na kena kawa e bula tiko me yacova mai na siga e daidai.
Sa mai yala toka e ke na noda i talanoa e na veimacawa me baleti rau na yalewa tevoro ka rau dau butakoca tiko na vudi, mai na koro ko Tukavesi, Natewa e na yasana o Cakaudrove.
Nuitaka ni o ni na taleitaka sara vakalevu na dau vakamuria tiko mai na i talanoa ka dina, ka a yaco dina e na dua na i taba gauna.
Sa vakavinavinaka sara vakalevu na nomuni tabana na Na i Lalakai ki vei ira na i Liuliu ni Yavusa ni koro ko Tukavesi, o Isimeli Koli kei Luke Veiqaliyaca e na nodrau bulagoci keda tiko e na i tukutuku ka rau donumaka e na nodrau gauna ni bula vaka gone.
Sa vakavinavinakataki talega vakalevu o Mikaele Vosayaco (Vakavuvuli), na turaga ni koro ko Tukavesi kei ira kece sara na veitokoni e na gauna e tiko mai kina e na nomuni koro na kena i vakalesilesi me la?ki vakasokumuna mai na kedrau i talanoa na yalewa tevoro kei na so tale na i talanoa ni nomudou koro vakaturaga.
