ENA vula sa dromu, e levu sara na kisi ni kama e rivotetaki ena tabana ni tukutuku kei iratou na tabana ni bokobuka ena noda vanua.
E levu talega na vuvale era vakayalia kina na nodra i yau kei na nodra i tikotiko ena vica walega na miniti ena vuku ni kama.
Vei ira era inisuataka na nodra i tikotiko kei na nodra bisinisi era na sega sara ni vakila na dredre ni bula baleta ni sa tu na ka mera na tauyavu tale kina.
Vei ira ga na vuvale e sega ni inisua tu na nodra vale, era na vakararavi ga ena yalo vinaka mai vei ira na wekadra kei ira era vakaitikotiko voleka ena vuku ni veika ni loloma era na ciqoma.
Na kena kama na tabana ni bisinisi mai na taoni o Korovou e Tailevu kei na tabana ni culacula ni Jack?s of Fiji mai Nadi.
Na kena kama na veitabana ni bisinisi vakaoqo, e mai tao kina na taladrodro ni bisinisi ka ra sega talega ni cakacaka o ira na tamata cakacaka ena tabana oqo.
Na vurevure ni lavo kina bisinisi e rua oqo ena vakila talega eso na dredre ena vuku ni vakacalaka vakaoqo.
Ena macawa sa oti, e rua veitaravi na kama e yaco e Suva, dua na vale mai Caubati kei na dua tale na vale e Nabua.
E da sa tadolava tale oqo e dua na vula vou ka sa i karua tale ni vula ena loma ni yabaki oqo.
Sa dina sara, ni sa totolo tu ga na gauna, na siga, kei na veivula.
E na macawa talega oqo e da sa rogoca tiko ena tabana ni tukutukui ni sa kacivaka tiko na noda i liuliu ni matanitu ni sa na vakarau vakacokotaki e rauta ni 56 na koronivuli era se vo tiko mera na vakavinakataki.
Eda vakavinavinakataka ni sa qai tekivu matata mai na levu ni koronivuli era se vo me vakacokotaki, ka da vakanuinui talega ni na matata mai e vica na i lavo ena gadrevi me na vakayacori kina na cakacaka bibi oqo.
E sa vakadeitaka talega o Voreqe Bainimarama ena nona vosa mai Matavatucou ni sa tu vakarau na matanitu mena qarava sara vakavinaka na cakacaka oqo, ka me kua ni vakusakusataki se me caka ga yani me rawa na kena tara na koronivuli.
Esa veivuke talega ena cakacaka ni veivakacokotaki oqo o ira na veimatanitu me vakataki Japani, Indonisia, Idia, Jaina, Ositerelia kei Niusiladi.
Na veitabana talega ni soqosoqo eso, na lotu era se tomana tikoga na nodra veivuke.
Me vaka eda kila vinaka ni dua na gauna dredre vei ira na gonevuli e mai vakacacani na nodra koronivuli me ra lesu tale ka vakadeitaki ira ni se tomani tikoga na bula, dina madaga ni tu wavoki na dredre.
Era vosota vata kei ira na nodra dauniveiqaravi na tiko ena loma ni vale laca, ni todra na siga se tau na uca.
Ena vuku ni nodra segata me ra rawata vakavinaka na i vakatagedegede ni vuli me vaka na veika e sa namaki ena gauna eda bula donuya tiko ena gauna oqo.
E vakadeitaka talega na Minisita ni Vuli, ni dodonu me ra na veitokoni vakalevu na veitabana kece ena loma ni matanitu ena kena vukei ka ra cokonaki se tokoni na luveda ena vuli.
Ni sa vakarautaki ga vakavinaka na nodra vuli na luveda, eda na rawa ni namaka sara na i vakatagadegede vinaka talega ni vuli era na yacova kei na veika era rawa ni yacova ni sa tiko na i vakatagedegede ni vuli e vinaka duadua.
Eda kila vinaka ni sega ni cakacaka rawarawa na kena vakalesui tale na nodra vale ni vuli kei na i vakatagedegede ni vuli e Viti- ka me rawa ni da liu tiko ena veika vakavuli ena wasewase ni vuravura oqo e na Pasifika.
Eda vakanuinui ni na cava na yabaki oqo, era na qaravi kece sara ka vakavotukana na tatadra ni matanitu ena kena vakacokotaki na veikoronivuli kece e Viti era se tikoga ena loma ni vale laca.
