Sa toka e ra na ikuri ni nona ivakamacala o Sakaraia Radovu me baleta na nona rai ni dodonu meda sokalou ena ikavitu ni siga ka sega ni matai ni siga ni wiki. Ni sa wilika sara yani.
AU vakarautaka vakacava ni ra “no show” na ituvatuva ni veituberi ni ekelesia Wesele edaidai? Ena kena levu duadua ga ni keda iwiliwili ena veivaleniveivesu na lewe ni ekelesia Wesele. E kasa dei tiko vei au na veimala ni vosa ni laba bula ka cavuta qo ko Talatala Koroi ni’u a bau vakamuria vakavinaka toka mai na veivakalotutaki levu ni Wasewase o Davuilevu ya. Kenai karua, ni bau la’ki coko tu kina na neirau cauravou ka tekivu yani ena veiqaravi bole, la’ki dewa sara na lewe ni stage boys ni timi ni veivakalotutaki qo me yacova ni sa kacivi me sa vakarautaka na nona ilakolako ki Peretania.
Biubiu e 6000
Au a vakamuria tiko mai na itukutuku ni ekelesia me baleta na keda iwiliwili na ekelesia Wesele ni 2023 ni a lutu ena rauta ni 6000. Kivei kemuni na sa veisau ka biuta tiko qo na ekelesia Wesele, sa koto na vakanuinui na vatavata ni veivakaroti qo ni ko ni sa dro sara tiko vei ratou na iKavitu ni Lesu Vakarua nei Jisu Karisito. Ia sa tiko nai vakadinadina ni sa levu sa vakatulewa me ra taura nai kalawa qo, ka sa ka levu na noqu vakanuinui vinaka ki vei ira.
E rua na ivavakoso e Naveiwakau, rau se vakatulewa makawa sara ni bera ni’u vakatulewa me’u vakatabuya na Sebeta Tabu ena ikavitu ni siga. Era sa kune kalougata tiko kina ena gauna oqo. Ia vei ira na takoso, ke ra lade ga ki na dua vei iratou na ekelesia ka ratou vakatabuya tiko qo na imatai ni siga ni wiki, au cavuta ga vei kemuni na vosavosa vakavavalagi ya, “You’ve jumped from the frying pan into the fire.”
Katini
Dua tale, ni kakua ni biuta na soli katini. Dina ga ni o Jone Wesele e vola na kena itukutuku ni koya e non-tither. E vakaqo na nona vakabauta ko Wesele ni da vakadeuca na ulutaga qo. E kaya o koya ni tamata me soli koya taucoko. Vakavakasama, vakayago ka vakayalo tale ga. Na ka qima me soli vua na Kalou.
O iko kei au e sega ni daru tautauvata kei Wesele ena vakatagedegede ni nona soli bula ena dela ni nona soli koya taucoko. Na sala ga e daru rawa ni taqomaki kedaru kina ena kena sotavi ka cakacakataki kina na ulutaga qo ena nodaru bula — solia na ikatini.
Na gauna eda soli katini kina, kua ni wilika ya me sa dua nomu soli. Sega. Eda vakasuka tiko e dua na ka, ka sega ni noda, e nona ga na Kalou. Da soli katini ga vua e vakani keda tiko vakayalo. Ni sa oti na soli katini, eke sa na qai tekivu kina na nomu soli. Koya na soli me kua ni kila na ligamuni mawi na ka sa solia na ligamuni matau, ke sa qai cici kina na vakasama ya mai na iVolatabu se na teiteivaki.
Ena ika 21 ki na ika 25 ni Okotova, 2024 e a qaravi ena FMF Dome mai Laucala na World Methodist Evangelism Sminar, ka’u bau kalougata ni’u tiko kina. Qai laveti cake mai kina na ulutaga ni soli katini.
Sa qai sau ni taro ratou qai mai vakadewataka tiko mai na valenivolavola ni Lotu Wesele e Viti kei Rotuma vei keimami na tiko ena vuli koya ni sa tiko na ituvatuva me na phase-out-taki na soli ni cakacaka levu se soli vakamisinari ka sa na vakaisosomitaki ena soli freewill.
Me vaka ga au a sa dau cavuta oti tiko vei kemuni na italatala ena noqu vatavata ena veigauna sa oti ena save kei na dada ni nomuni dau vunautaka vei keimami na ulutaga ni soli katini me vakatauvatani kei na vo ni mata lotu ra tu qo. Koya na itukutuku ni soli freewill ya mai na FMF Dome, ya sa qai save ka dada ca ga kina na nomuni tukutuku. Qo e dua na ituvatuva e sega ni lomani kina na kawa iTaukei — na neimami vakavulici me keimami douvaka me keimami butakoca na Kalou. Vei kemuni na lecava na ulutaga qo ena Volatabu, ni wilika na Malakai 3 : 8-12. Qai kaya tiko kina vakaqo ne o Koya, “Dou vakatovolei au mada.”
‘Butakoca na Kalou’
Sa keimami vakavulici mada me keimami vorovoro lawa, se voro constitution ni Kalou sa qai mai kena ikuri qo na neimami vakavulici ena corporate pilfering ena neimami butakoca vakaivavakoso na ilavo ni nona yavu ni vakavulewa na Kalou.
Au a sa kaya tiko vei kemuni na italatala ena noqu vatavata ni veivakaroti: Ni vunautaka mai vakaukauwa ni dodonu me keimami solia na ikatini ni qo e nona ga na Kalou. Me oti me qai moqe na neimami bula vakayalo me vakavulici keimami me keimami vakararavi vakatabakidua vua na Kalou me qai leqataki keimami kei na neimami veimataka ni sa laurai ena rai vakatamata ni sa soli oti na ikatini, ni veika sa vo sa takiviyaga sara.
Sa na gadrevi ga e na gauna ya na Kalou me keimami vakararavi kina me vakaikuritaka. O Talatala Kolivuso ni sa dau solia na nona ikatini. Qai dau vunautaka vei ira na nona i vavakoso mai Nausori na kena vakadomobula mada ga vua me vakasamataka me tara vakaikoya na nodra ikatini na ivavakoso. Ni dua e teitei mai vua, ena taroga lesu o koya – qo e kani cava? Na isau ni taro – Na neitou ikatini keitou sa via teivaka yani vei kemuni. Sa biuta sara ga vakatikitiki o koya ni sega ni na via tara.
Na isoqosoqo lotu na taba ni were ni CMF mai Nausori qo, kevaka e via volia e dua na ka, o ira, me vaka ena kena cavucavuti vakavavalagi, ira ra cash-taka ga na ka. Se, ke sega, e soli wale vei ira na veiyaya sau lelevu era masulaka vata vakaekelesia me ra rawata.
Qo ni soli tikoga vei Jiova na ka e dodonu me soli vua.
Sa duatani sara
Dua tale ga na kauwai ka kaya o Talatala Kolivuso ena nona sa la’ki lesuva mai na vale ka tauyavu kina o Wesele kei na nona rai lesu mai ki Viti ena vanua e tu kina na ekelesia Wesele edaidai sa duidui sara mai na veika sa la’ki wilika mai kea.
Au a kaya tiko mai cake ni keitou a masulaka tiko vakavuvale ke rawa ni vakatara tale na Kalou me se tei Peresitedi tale mada vakadua mai Mereke ko Donald Trump. Da vakavinavinaka ni Kalou qo dau rogo masu dina ga ni a sa parofisaitaki tu o Nostradamus kei Allan Lichtman ni na qaqa ko Kamala Harris.
Ia sa qaqa tale ko Trump. Sa soli tale qo e dua na gauna ni loloma se grace period sega wale ga vei Mereke, ni rogoca na Kalou na noda masu sa dusia tale ga ni sa soli tu ki na Ekelesia Wesele kei na Ekelesia va-Karisito e Viti kei Vuravura edaidai me saumaki ka veivutuni. Da vakayagataka na Lako Yani Vou qo me da vakasavasavataka kina na noda loma ni vale. Da tu ena sala ka vakararai.
Au sa vakauqeta na lotu me cakava na digidigi e daidai ena Lako Yani Vou sa veisureti tiko kina na ki na sala sa muria ko Wesele. Na sala sa muria ko Paula. Na sala era a muria ko ira na dau vakamuri Jisu. Sa ikoya ga na sala ka muria taumada na gone turaga ko Jisu Karisito.
Ena vakasama vakatamata, vei au mada, na lima na yabaki sa bau wadrega me na vakatulewa kina na Lotu Wesele me veisautaka na nona yavu ni vakatatabutaka ni siga dina ni vakacecegu dina mai na imatai ni siga ni wiki ki na ikavitu ni siga.
Vakatulewa vakavinaka
Da vakatulewa vakayalomatua, kevaka era se yalo qa tiko ga na qase levu, da kua ni vakamuri ira na qase levu qo. O ira era bubului kina dua na ivakavuvuli ese qai dua na drau ciwasagavulu (190) ga na yabaki na kena vakamuri e Viti ka sa sega na kena yavu vakaivolatabu. Era na solia kina na nodra dina ni ra a vosa bubului kina me vaka sa cavuta koto na qase levu vakacegu.
Ni sa tiko ga na yalo ni talaidredre, sa na dredre me da veisau.
Na lima (5) na yabaki qo ena lekaleka. Da masulaka mera vakamalumalutaki ira ka me ra yalomatua na noda qase levu kei ira na noda italatala kei na kena ikuri me ra tagane mada.
Daru kua ni vakatara na nodra yalowai me kauti kedaru ki na rusa baleta ni daru sa kila na dina ni vakavuvuli nei Wesele, na nodra vakavuvuli na dau muri Jisu ka ivakavuvuli nei Paula me vaka ga sa dau vakaitovotaki koya kina ko Jisu ka se ka sara mai na ivakatekivu. Meda sa kua ni vakacalai tikoga!
Qo e nona rai ga o Sakaraia Radovu ka sega ni nona na Na iLalakai.
