Ena Bose ko Viti ni 2023, sa basika na mata mai na tabana levu mai Ositerelia, na Lotu Wesele mai Ositerelia.
E matataka tiko mai o Talatala Viniana Ravitalei me mai vakatura ki na Lotu Wesele e Viti na nodra ciqomi me ra lewe tale ga ni noda ekelesia Wesele e Viti ko ira na wekada era sa okati ira tu ki na iokaoka ka ra vakatokai ira me ra lewe ni LGBTQ+.
Vakamau vakatagane kei na yalewa
Ni bera ni toso na vakamacala ni veivakararamataki ni sasaga ki na Bose ko Viti ni 2023, dua na itukutuku ena yaga mo ni kila rawa tiko na veiwekani, ni gauna sara ga qo, na Lotu Wesele mai Ositerelia sa vakadonuya oti na nodra wili me ra ivavakoso. Sa vakadonui tale ga ena Lotu Wesele mai Ositerelia me ra mai vakamautaki vakalotu na tagane kei na tagane ka vakatalega kina vei ira na yalewa ena loma ni nodra veivale ni lotu mai Ositerelia.
Qo na vuna koya ra sa se tani kina e so vei ira na noda ka ra sa la’ki dui qarava no ga vakai ira na nodra dui so-Kalou ena nodra sega ni via oka kei nai lakolako sa digitaka na tabana levu qo mai Ositerelia me ra muria.
Ke donu na itukutuku au ciqoma, sa nodra talatala qase tiko ni Wasewase koya ra sa se tani mai na Lotu Wesele Levu mai Ositerelia ko naita Talatala Qase Pau Tabulutu ka nona tuirara levu ko Eugene Raikobo.
Koya na ka e vakadomobula kina na galala sa vakadonui ena loma ni tabana levu ni Lotu Wesele mai Ositerelia qo, ni koya na vakamau vakamataqali vata qo, sa vakadonui tale vei ira sara ga na kena italatala turaga se marama, me ra vakamau vakamataqali vata.
De a mai saga tale o Talatala Ravitalei me mai vakadonui na vakamau vakamataqali vata? Au sega mada ni kila? Matai mada:
- Ena loloma levu ni Kalou sa tu qo, koya na gagadre ni nodra vakadonui me ra mai lewe ni noda ekelesia e sega sara ga ni dua na kena dredre.
Na Kalou e lomani keda kece vakatautauvata.
Sa rawa talega ni vakayagataki na vatavata ni noda mai veitokani, me ra vakaveikilaitaki vakavinaka kei Jisu kei na kena moici me cilavi na nodra vakasama ena cala ni vakatulewa ni digidigi ena sala era nanuma tiko me ra muria.
- Koya ga na vakasama ni nodra nanuma me mai vakadonui me ra mai vakamautaki vakalotu vakamataqali vata ena loma ni noda valenilotu – sega. Rauti ira vinaka me ra la’i vakamautaki yani ena dua na ravisi-olo. Ke vakatarai ena loma ni noda lotu, sa qai dua na boica levu ena loma ni noda veivalenilotu.
Vakatakilakila ga
Na ilakolako ni veivakararamataki ka a mai qarava o Talatala Ravitalei e ivakatakarakara lailai ka malumalumu ga ni veika lelevu ka kaukauwa sa parofisaitaki tu ena iVolatabu me na yaco ena gauna mai muri.
Mai muri, ni sa na tauyavu rawa na matanitu cokovata se one world government, o koya na tu me veisaqasaqa kei na Karisito se na Anti-Christ ena sega tale ni lako mai me vaka na nona lako mai o Talatala Ravitalei.
Lako mai o Talatala Ravitalei, e bau lokumi toka ena nona mai saga na ituvatuva cava ga e a via mai vakatura ki na Bose ko Viti ni 2023.
Na gauna na cadra ka tekivu cakacaka kina na Anti-Christ kei na parofita vakailasu, rau sa na lako ga mai vakaukauwa ka sega tale ni mai kerekere se soli vakatutu.
Sa na lako sara ga mai me sa vakaukauwataki na Sunday worship. Sa na lako mai me vakaukauwataki na nodra dodonu o ira LGBTQ+.
Sa na lako mai me vakaukauwataka na nodra mai curu na tagane me ra qito ena veiqito eso era veisisivi kina na yalewa, me vaka sa la’ki voro isausau tiko kina qoka na cauravou ko Will Thomas sa vuki me yalewa me ko Leah Thomas ena veisisivi qalo vei ira na yalewa mai Mereke nikua.
Era na vakaukauwataka na nodra vakavulici na luveda era se vuli ena sova ni vuli ka dewa yani ki na kalasi 1, 2 ka lako cake ni sega ni cala kevaka e tukuna vei ira na yalodra ni ra dodonu me ra yalewa kevaka era tagane tiko se dodonu me ra tagane ni ra yalewa vinaka sara tu ga.
Qai vakarau tiko na veidigidigi mai Mereke, sa kaya tiko o Donald Trump ni na vakatoboicutaka kece na lawa sa vakadonui kina na veika kece qo koya ratou mai dolava na matanitu nei Jo Biden.
Ia o Koya na tu me veisaqasaqa kei na Karisito se na Anti-Christ, koya ena lako mai ena mai vakaukauwataka na veika ka kece qo kei na veika kece ga sa sega ni va-Kalou. Na kena veivakatakarakara eso e vica sa’u cavuti oti toka ya.
Ena qai kena ikuri na nodra laukini me ra tiko lo na veivale ni volavola ni kakaburaki koya ra vosa vakacacataki ratou.
Sa qai vakayagataki na liga ni veiqaravi vakamatanitu eso na CIA, na FBI, na veivalenivolavola ni turaga se marama ni lewa me veilewaitaki Trump ena veibeitaki vakailasu eso me vakarau cakava toka qo ko Letitia James kei Fani Willis.
Na cakacaka ni veilewai kece qo e ratou vakailavotaka na Soqosoqo se na vuvale e tolu (3) qo:
- Soros Network;
- Tide se tight Foundation; kei na
- Arabella Advisory.
Qai kena ikuri ni nodra cakacaka sai koya na kena vakalutuki na nodra vakailavotaki na sotia luvaisulu se na war veterans mai Mereke kei ira nai taba qase se na senior citizens sa qai vakagolea dua na ilavo levu qo me saumi kina na nodra vakaicilitaki ena vei-otela na kai matanitu tani ra curuvanua vakailoa yani.
E vuqa vei ira qo era kaivesu rerevaki ka vakailawalawa se gangs ka ra sere mai na veivale ni veivesu mai na veivanua vaka-Ceva-ni-Mereke se vaka-Iurope.
Sa tiko o ira na drau-vaka-drau era takosova mai nai yala ni veivanua kei Amerika, sa qai tiko o ira era vakavodoki sara ga mai vakaturaga mai na veivanua mai Iurope ka qai ra la’ki bala yani ki na veirara ni waqavuka e na lomaloma kei Amerika ka ra wase na vanua ka ra vakatokai me ra Blue States ni ra vanua liutaki mai vei iratou na Democratic Party.
Saumi na kedra.
Ni ra vana mate na ovisa se ra kucu se ra butako, sa vakamamadataki na kedra itotogi. Ka ra vakasukai tale yani.
Na cala vata ga ra vesu mai kina se ra bai cakava tale mai na dua tale na yasana koro kadua.
Qo nai yaloyalo ka rai vakatakarakara lalai ga ni veika lelevu ka caca laivi sara me da namaka me na yaco ena gauna e muri.
Qo e nona rai ga o Sakaraia Radovu ka sega ni nona na Na iLalakai.
