Me matata na noda duavata

E KOTO ena ikavitu ni drauniveva ni noda itabe ena macawa sa oti e dua na nodra vosa na iliuliu ni noda matanitu digitaki. E kaya tiko kina o Sitiveni Rabuka ni cala se lasu na kena tukuni tiko ni da dravudravua ia eda vutuniyau tu ena iyaubula.
Ena sega ni rawa ni dua me na vakalasuya se vakacala ni levu tu na noda iyaubula. Ia ena dredre talega me da tukuna ni sega vei keda na dravudravua. Ena vakatau toka ena noda vakadewataka se cava sara mada na dravudravua.
Ia se mani cava na ibalebale ni dravudravua, e vakabauti ni vosa e a cavuta oya o Rabuka e kena inaki levu ga me bolei keda.
Esa tukuna sara tu ga vakamatata ni da taukena tu e dua na tamani wase levu ni iyaubula ena noda vanua. Kaya tale tokaga ni da sa lewe levu. Ia ena maumau na keda lewe levu ke sega vei keda na duavata.
Eda sa donuya tu oqo e dua na gauna esa rabailevu levu na veika eda rogoca ka kila. O koya gona ya, ena so na gauna baleta ni sa tiko vei keda eso na kila, esa na dredre toka vei keda me da vakarorogo. Qo e vakabibi tiko vei ira na sausau vou, o ira na inuinui ni dua na vanua ena veisiga ni mataka.
Era sa na vuli vinaka cake vei ira na tamadra, tinadra, tubudra kei na budra. Ni ra sa vuli vinaka, era sa na yacova eso na itagede kei na tabana ni veiqaravi era sega ni bau yacova na itaba tamata ka liu vei ira.
Se mani cava na tabana era veiqaravi kina kei na tagede era yacova, ena dodonu ga me tiko vei ira na itabagone na vakarokoroko. Na kena idole mai vei ira na itabaqase na nodra roko yani na gone sa ikoya na nodra rogoci baleta na kila esa tiko vei ira.
Ni rau biu vata, esa na yaco ka kune na bula vinaka. Ia me yaco taumada na duavata.
Eso era na kaya ni sa bau dua na ka dredre. Oqori e dua na itovo ni rai. Ia vakacava kevaka da duri vata ga mai ena dua na vanua ka da raica ni o keda kece sara eda gadreva tu na bula vinaka.
Ni da sa duavata ena gagadre oqo, me da sa qai cavu ikalawa ena kena ena tarava mai. Oya sa ikoya na kena vakamatatataki kina dua na uma tamata, soqoso se ikumukumu se cava sara mada na ibalebale ni vinaka vei ira na lewena.
Na gauna esa matata kina oya, me sa qai tuvani vakamatau sara na veika me caka me rawa kina na vinaka oya. Ena oka talega ena ituvatuva oqo se o cei ena vakaitavitaki ena veika me caka kei na gauna me na qaravi kina.
Kevaka esa va toka oqo na roka ni cavu ikalawa, esa na tarava ga mai na rawa-ka. Sa na qai gadrevi sara vakalevu na duavata ena itagede e tarava baleta oya ena caka kina na kena votai na vua ni rawa-ka. Kevaka e sega tiko na duavata, qo na vanua se gauna ena tubu kina na veisei.
Esa rui ka bibi sara na duavata. Na gauna e sega kina, eda sa kila vinaka na ka ena yaco. Eda na duisalasala ka sega soti sara ni vakavotukana na noda sasaga. Ia ni da cola ena yalovata na itavi, eda na tauca na vuana e vinaka.
Qo na veika eda sa kila kece sara tu.
Ia ena gauna oqo, esa lai tukuna mai na Paraiminisita ni sa buku na druadrua ni ivalu — kena valuti na dravudravua.
O cei beka sa na lewena na mataivalu oqo? Ena wasetaki vica beka na mataivalu oqo? Na cava sara beka na nodra itavi na duidui tabana ena loma ni mataivalu oqo?
Na ivalu oqo ena vakatabakidua ga kina dravudravua ga vakavuravura se dravudravua talega vakayalo?
Qo talega e dua na tikina bibi — na kena vakayalo. Baleta ke sega na kena yalo, ia sa na dreve sara tu ga na inaki ni sebera madaga ni tekivu.
Ena tiko talega e dua na tiki ni sasaga me valuti kina na dravudravua ni kila?
Qo e vica wale saraga na taro me vakavure vakasama tu vei keda na veiwekani. E totoka sara tu ga na nona inaki na turaga Paraiminisita.
Sa qai vo me da matata yani o keda!