Update: 10:52AM ESA na vakayacori tiko ena i matai ni gauna na sotasota ni yabaki 19 lako sobu ena sotasota ni Fiji Bitter Nawaka Sevens ena yabaki qo.
Ena vakayacori tiko na sotasota qo ena i ka 12 kei na i ka 13 ni Me ena rara na Prince Charles Park e Nadi.
E vakaraitaka ko Jioji Kinisi na peresitedi ni kalavo ni rakavi e Nawaka ni ratou marautaka na kena vakacurumi ena yabaki qo na sotasota ni yabaki 19.
E kuria o Kinisi ni na vakauqeta e levu na timi me ra na vakaitavi ena sotasota qo. A vakaraitaka ko Kinisi ni sa vakauta na veisureti ka na soli talega nai covi vei ira na qaqa ena veiwasewase ni sotasota ni yabaki 19.
E tomana o koya ni se vo tiko e walu na timi me na vakaitavi ena sotasota ni yabaki 19, ia ena gauna qo esa vakadeitaka na nodra vakaitavi e 10 na timi.
E kaya me vaka ni sa qai matai ni yabaki me na vakayacori kina na sota ni yabaki 19 esa na kena rairai tiko ni na tauri taucoko na lewe 10 na timi sa tiko rawa.
Na timi era sa vakadeitaki ira oya na timi ni Nawaka A, Nawaka B, Eagle Brothers, Dratabu, Natabua, Ratu Filise, Saunaka, Mosi Steelers, Draulu kei na timi ni Navokaca
E tukuna o Kinisi n sa tubu na i lavo e valataki ena yabaki qo. E kuria o koya ni veitimi lelevu ena vakaitavi tiko oya na timi ni Westfield Tokatoka Dragons, New Net Yasawa, Army Green, Army Red, Silver Waters Barbarians, Wardens Gold, Can Do Generation, First Light Taveuni, BLK First Landing, Uprising Rugby, Tabadamu kei Ratu Filise.
Ena sotasota vei ira na goneyalewa ena qito tiko na timi ni Striders, Nadi Blazers kei na timi ni Wardens.
