Update: 9:17AM ESA dola saraga e na yakavi ni Moniti na vakatawase e na nona sa qaqa na timi ni Moce vei Suva e na sotasota ni kirikiti. Era sa qiri kava kei na vei fakawelataki e na gauna e ra rogoca kina e na retio na tukutuku ni qito ni sa mai qaqa na nodra timi ni vanua.
E marau na vanua turaga o Delaimakotu e na nodra sa vakavakarau tale me ra cereva na nodra timi ni vanua ena vuku ni qaqa qo.
E vakaraitaka o Tataka Sigaca Buadromo na i vakalesilesi ni timi ni Moce vei ira na gone ni Moce e ra tu vakacakacaka e Suva ni dua tani sara na nodra vakarautaki na lewe ni timi e na yabaki qo. Na timi ni Moce e a qaqa vei Suva e na fainala ni kirikiti e na sotasota ni siga ni mate ena mua ni macawa ka laveta tale kina na bilo cecere ka vakatokai tiko na Crompton Cup.
Na nodra vakarautaki mai vanua na lewe ni timi e ra tabu tu mai e na yaqona, kei na tavako ka vaka kina o ira na vakawati era tabu ni ra qai laki moce tale ki na nodra dui veivale, e kaya o Buadromo. E kuria o Buadromo ni ra tabu sara tu ga e na vanua kei na lotu ni bera na nodra gole mai kina sotasota macawa tolu qo ni Kirikiti. E kaya ena gauna era mai tiko voli kina e na qito e Suva era veivuke na vei talatala qase ka ra gone ga ni Delaimakotu ena nodra mai tuberi tiko e na veimataka kei na veiyakavi e na bula vakayalo.
E ratou mai rawata na qaqa na timi ni Moce e na kaukauwa saraga ni Kalou oya e na kena vakamuri ka rokovi vinaka na tabu era vakatabui kina, e kaya o Buadromo.
E tomana o Buadromo e na nodratou qito voli mai na timi ni Moce e duidui sara na nodratou qito ka ni ratou tautauvata kece na kaukauwa e tiko vei ratou na dauqito ena vuku ga ni ratou sa bau vakarautaki vinaka e na bula vakayago kei na bula vakayalo.
Ena gauna qo esa vakavakarautaki tiko na kena vakayacori na kana vata vei ira na timi ena yakavi nikua (yakavi ni Tusiti) mai Tovata ni bera ni ra qai vakarau kina gole yani ki vanua me laki vakayacori kina na kena soqo, e kaya.
Ia, na vakavakarau mai vanua e tautauvata ga na vakavakarau ka vakayacori ena 2012 e na nodratou a rawata yani na bilo oya e na nodra sa na vakarautaki na nodra i sulu masi na dauqito kece kei na nodra vakarautaka na vanua ni soqo kei na nodra waraki me ra na cerevi na cauravou.
Era a vakarogo walesi toka na vakatawa toka mai delkaniyavu e na siga Moniti me baleta na sota ni timi ni Moce kei na Suva Warriors .
E na gauna e sa qaqa kina o Moce e sa dola tale ga na vakatawase mai vanua e na nodra sa qiri lali kei na kavaena Moniti me yacova na nodra tadu yani.
Sa ra sa mai tara talega e na veika era a tabu tiko mai kina.
