E mai vakadeitaka e Palimedi na Minisita ni Qele na kena vakayagataki na noda qele na i taukei ena kena lisitaki ki na Baqe ni Qele.
Na gauna ko na solia kina na nomu qele, ki na matanitu, mo na qai wawa ena loma ni lima na yabaki me na dua na daunibisinisi me na mai vakatoroicaketaki na qele.
Kevaka e sa sega oya, ko na qai rawa ni taura lesu tale na nomu qele.
Ena gauna oqo e sa 26 kece mai na 79 na i kovukovu ni qele era sa lisitaki ena Baqe ni Qele.
E wili eke na kena sa kau tiko na bauxite mai Bua ki na vanua levu o Jaina.
Eso tale na daunibisinisi era sa mai vakavure i lavo kei na bisinisi ena noda qele na i taukei, ka mai vakayagataki na qele levu eda taukena tu.
Ena gauna oqo e sa raica talega vakayalomatua na matanitu na kena lisitaki na qele voli vakadua kei na qele mai na matanitu mai vei ira na vavalagi.
E dau laurai ni ra sega soti ni doudou na vulagi me ra lisitaka na noda qele na i taukei.
Na i naki ni nona sa via dolava tiko na kena vakayagataki na noda qele na i taukei na matanitu mai vei ira na vulagi, oya na kena sagai na noda vakatoroicaketaki ka dolava yani kina veitabana ni bisinisi na i taukei na noda qele.
E levu tu na noda qele, era dabe wale tu ga ka sega ni dua na veivakatoroicaketaki e yaco tu me na kauta mai na i lavo kei na bula vinaka vei ira na lewenivanua.
Ia, ni da raica na i tukutuku, e kunei ni levu ga vei keda na i taukei eda wili tiko meda tamata dravudravua, ka dina madaga ni da kaya ni da i taukei ni qele.
E sa na gadrevi ga na noda yalomatua na kawa i taukei ena vuku veika e sa tara tiko mai na noda vanua.
Na kena veivosakitaki kei ira na veitabana ni matanitu na i matailalai kece ni veivakatoroicaketaki ena yaco, ka bibi me ra na kila tiko na lewe ni yavusa se dua na mataqali ena vakayagataki na nodratou qele na veisau e sa na tara yani na nodra bula ni ra sa mai solia na nodra qele vei ira na vulagi.
Oya na vuna e sa ka bibi kina, me da na kua ni madua ka taroga na taro vei ira na noda i liuliu e Palimedi.
Eso talega na i taukei ni qele, era sega ni dau nanuma tale na vo ni nodra mataqali se yavusa ena gauna era dau wasea kina na i lavo ni lisi.
Esa ka bibi na noda dau veinanumi tiko ka kauwaitaki ira na wekada eda lewe ni vuvale vata.
Eda na namaka tikoga mena taucoko ka yaco tiko na lewa vinaka kei na lewa matau mai vei ira na noda era cicivaka tiko na Tabana ni qele, na Tabacakacaka ni Qele Maroroi kei ira na kena i vakailesilesi.
Ena gauna oqo e sa sega ni vinakati me so era ma qito duka tiko ena kena cicivaki ka maroroi vinaka na noda qele na kawa i taukei, vakauasivi vei ira na noda era na muri mai.
