E dua na siga taleitaki vei ira na lewe ni yavusa o Nakorolevu e na koro ko Muana e na Tikina o Toga Naqavoka na siga Vakarauwai e na macawa sa oti, ka ni a vakayacori kina na siga kei Nakorolevu.
E a tekivu vakalotu na soqo e na siga oya mai vua na i Vakatawa ni Tabacakacaka o Muana o Ratusalia Macileko, ni bera ni qai dua na nona vosa ni veikidavaki na jeameni ni koro ko Muana o Talatala Jim Miller Sivo.
Ni oti toka vakalailai na ciwa na kaloko, e sa tau na i matai ni solisoli ka ratou vakaitavi ga kina na mataqali e ra tiko e nakoro.
Ratou a dolava na soli e na siga oya na mataqali o Namadadredre, tarava yani na mataqali o Natikoriwaca, tarava sara yani na Mataqali o Waisousou, Vunivaivai ka sogosogo yani na mataqali o Nakorokoro.
Ni oti nai matai ni tau soli e ra mai veicurumaki yani na veimataqali meke ka sega ni yali kina na i vukivuki ni tuisi ka ratou kilai tani kina na marama ni Bua mai Vanua Levu.
E sega ni cegu rawa na veimeketi, wili kina na fakawela, salavata kei na draki vinaka ka vakarautaka na Tamada sa Cecere sara.
Na soqo e na siga oya e ra sa vakasota ga kina na veitauvutaki o Noco kei Lau, ka vakakina o Lomaiviti kei Vanua Levu, ka ra sega ni vinakata me ra druka e na nodra sa veisamei toka e na loma ni rara.
Ni qai taqiri ga mai na i vakatagi e ra dui cerebu mai na loma ni vei vakatunuloa me ra digia na nodra tau, vakabibi o ira na veitavaleni era tiko e na siga namaki.
Ni cegu vakalailai na veivakamarautaki, sa vakayacori sara na i vakasigalevu, ka ra dui veivakani ga e na nodra vei vakatunuloa.
Oti na vakasigalevu e vakayacori tale e so na meke kei na vakatasuasua ni bera ni qai mai vakayacori na i karua ni tau soli e na tolu na kaloko e na yakavi.
Ni sa laki dre ko Malolo e ra sa mai kumuna rawa kina e na yakavi ni siga oya na yavusa o Nakorolevu e $7 725.35.
Se bera ga ni sogo tale Vakalotu e vosa tale ni vakavinavinaka o Rev. Sivo ki vei ira na lewe ni yavusa e na nodra yalovata e na siga oya, ka ni lavo e kumuni rawa e na veiyabaki e gole vakatabakidua ki na soli ni yasana, na soli ni vanua, ka vakakina na veivakatorocaketaki e vakayacori tiko e nakoro
Oti oya e sa qai mai tinia na lotu na i Vakatawa e na tiki ni Vola Tabu kilai levu, Tamata vinaka e dina, sa dina e na ka e vica ga, sa lesi iko mo lewa na veika e vuqa.
Ni sa oti na lotu e sa qai mai carubi yani na veibuturaki e na wai ni vanua me yacova sara ni sa ubia mai na veivakatunuloa na butobuto ni bogi, kei na cagi batabata mai na uciwai na Rewa.
