Update: 10:15AM NA kali nei Adi Sovanatabua na tinadrau na Ciri esa vakaraitaki tiko ena gauna oqo ena Vale ni iYaya Maroroi e Suva.
Na kali oqo e dua vei ira na i yau maroroi ka vakaraitaki raraba meda sarava na lewenivanua kei na vica vata tale na tabua e na Vale ni iYaya Maroroi.
Na i naki ni kena vakaraitaki mai na i yau vakamareqeti oqo oya me na veivakararamataki kina vei keda na lewenivanua na yaga kei na veika e dau vakayagataki tu kina na i yau vaka- Viti oqo ena gauna eliu mai vei ira na noda qase.
A laki dolava na kena vakaraitaki raraba na tabua, wili kina na kali oqo na Peresitedi ni noda vanua, o Jioji Konrote, ka vakabibitaka na yaga ni tabua ena noda i tovo na i Taukei.
Na kali nei Adi Sovanatabua e vakaraitaka o Mereia Luvunakoro, na i vakailesilesi mai na Vale ni iYaya Maroroi ni ratou mai ciqoma ena vica na yabaki sa oti.
�A solia mai na kali qo, ka via 60 na senitimita na kena balavu ko Adi Titilia Natoroca mai Narewa, Nadi ena 1982.
Na kena soli mai oqo me mai maroroi ena Vale ni iYaya Maroroi ka ni oqo na nona kali o Adi Sovanatabua,� e kaya o Luvunakoro.
A kunea nai kali qo nei Adi Sovanatabua ko Apolosi R. Nawai ena wasawasa ena kedrau tadrua o Mana kei Veiseisei ka sa dau mai vakayagataki sara tiko ena veiqaravi ni lotu ka sema sara tiko ki naViti Kabani.
E kilai talega na i tukutuku ni o Nawai e dau tekivuna tu na Viti Kabani ena gauna se liutaki mai vei ira na valagi se na gauna ni KOloni e VIti.
A mani la�ki maroroya tu mai Nakauvadra me lima na yabaki ena kena la�ki rawata na kaukauwa mai vua na kena itaukei ko Adi Sovanatabua na tinadrau na Ciri o Cirinakaumoli kei Nakausabaria.
Ko Adi Sovanatabua e marama ni Nubu ka kilai ni luvedra na turaga na Tui Nubulevu ena gauna e liu.
Na wati Adi Sovanatabua o Ratu Waicalanavanua, ka tukuni talega na kena i talanoa ni tamadrau na Ciri. na na yacai Waicala se ko Waicalanavanua na wati Adi Sovanatabua.
Tekivu mai ena macawa sa oti, e dolva tu na Vale ni i Yaya Maroroi me da a laki sarava na veimataqali tabu kei na kedra i tukutuku maroroi.
E vica talega na kena dau era na vakamacalataka na veika e dau vakayagataki kina na tabu ena vuku ni nodra vakadidike.
E vakarabailevutaka talega na noda rai kei na noda kila na veika era dau vakayagataka tu na noda qase.
Na kali oqo e sa laki oka tu kei na veimataqali tabua era vakaraitaki tu ena vale ni yaya maroroi baleta ni tukuni ni oqo e i leu ni dua manumanu.
Ia, e tukuna na marama ni Kabariki mai Kadavu o Luvunakoro ni tabua eratou maroroya e duidui na kedra roka, duidui talega na kedra i bulibuli.
O ira na tabua oqori eratou vakasokumuna rawa mai na veiyasai Viti.
