Duatani e ciqoma na yaqona, dua tale e taura na lisi

ENA noda Viti, eda rawa ni tukuna ni sa bula tiko kina e rua na ituvatuva. E dua e noda ga na iTaukei. Ka dua tale era a kauta mai na Vavalagi.
Na noda, e dua na kena yavu sa ikoya na vosa. Ia o koya e qai kauta mai na Vavalagi, e yavutaki ena veika e volai.
E rau sa mai bula vata tiko ena gauna nikua. Eda sa dau raica ena veivakatikori vakaturaga vakavanua. Ni oti na nona vakatikori o koya esa digitaki me iliuliu ni vanua, ka vakayacori kina na vakacacabo bibi eso, esa qai vakacavari na veiqaravi ena kena vakamatanitutaki. Oqo sa ikoya na kena volai.
Ena macawa mai oqo, esa na tekivutaki tiko yani e dua na italanoa baleta e dua na tiki ni qele.
Na gauna e gadrevi kina me dau qaravi e dua na cakacaka ena tiki ni qele oqo, e kau na yaqona kina dua na yavusa. Ia na gauna e soli kina na kena lisi, e taura e dua tale na mataqali ena dua tale na yavusa duidui.
Eda na rawa ni tukuna ni sa veicalati na ituvatuva e rua — vakavanua kei na vakaivola.
E ratou sa lomasoli na vanua ka dau lai caka tiko kina na yaqona me sa wasei na nodratou italanoa. E tiko vei ratou na kena ivakadinadina ka sa vakila tu o Viti na nodratou yalovinaka.
Ena nodratou italanoa, e ratou sa kerea tale tikoga me kua ni nanumi ni ratou vinakata ga na ilavo. E ratou tukuna ni bibi cake sara me talanoataki na ka e dina ka dodonu.
Esa na tovolei talega me ia na veitaratara vei ratou na mataqali e ratou sa taura tiko na ilavo ni lisi.