Update: 11:58AM NODA Railesu e na macawa oqo, eda na wilika kina na veivuke ni Matabose ni Veivakavaletaki vei ra na tiko e na vale makawa se vale rusa.

Ni tei wilika sara mada yani na i tukutuku ka a tabaki e na Na i Lalakai e na yabaki 1981:

Na bula e na vale nei Alivereti Vunivesi kei na nona matavuvale, e sa dua dina na bula vakaloloma ka veivakararawataki talega.

E ratou a tawana tiko e dua na rumu lailai ka tiko kina e dua na i davodavo vakataurua, ka voleka ni vakaosota taucoko na loma ni rumu.

Na gauna e dau tau kina na uca, e turu ga mai na wai mai delavuvu ka drodro vakadodonu sara yani ki loma ni vale.

Na ka e dau qai cakava o Vunivesi, o ya me vesuki ira vata e so na kava kei na siligi ni vale, me rawa ni bau tarova toka mada ga vakalailai na turu ni wai e loma ni vale.

E vuqa sara na gauna e ratou na dau vakasaqa toka ga e ruku ni nodratou vale, ka ratou dau kana talega kina ni draki vinaka tu na vanua.

Na gauna e ratou dau vakavulagi kina, e dau soli vei ira na vulagi me ra dau moce e loma ni rumu, kei na luvedrau e lewe tolu, ia o rau na veiwatini e rau na dau moce e na dua na vava kaukauwa ka semati tiko e na dua tale na vale ka tara tu vakavo.

Ko Vunivesi kei na nona matavuvale, e ratou vakayagataka vata tikoga e dua na vale ni sili kei na valelailai, kei na lima tale na matavuvale era vakaitikotiko vata e na vale makawa oya.

Na vale oqo e tiko e na i tikotiko e na Jittu Estate, e na i ka 2 veimama ni maile e Nasamabula.

Ia, e na gauna oqo sa veisau sara na bula e na matavuvale nei Vunivesi e na nodratou veivuke na Matabose ni Veivakavaletaki na Housing Authority.

E kaya na manidia ni matabose ka qarava na dikevi ni cakacaka ka liutaka talega na tabana ni tukutuku, o Fazal Khan, ni a tukuna cake yani na i tukutuku e sota kaya tiko ko Vunivesi e dua na i vakalesilesi ni bula raraba mai na Housing Authority.

�Keitou sa mani nanuma kina ni gadreva dina na veivuke ko Vunivesi.

�Na neitou vakadidike ni sega sara ni dua tale na vanua e na vakanamata kina o Vunivesi me na vukei mai kina,� kaya o Khan.

Na vuna o ya e sa qai solia kina na matabose vei Vunivesi e dua na vale saumi mai Raiwaqa me la�ki vakaitikotiko kina.

Sa mani toki sara yani ko koya kei na nona matavuvale e na vale totoka oqori e na loma ni vica na vula sa oti.

E cakacaka tiko e na wavu levu e Suva ko Vunivesi, ka sa marautaka dina na nodratou solia vua na Matabose ni Veivakavaletaki e dua na vale vinaka ka sa vakaitikotiko kina e na gauna oqo.

E kaya o Khan ni sa i vakarau tudei tiko ni matabose me solia na vale me ra redetaka o ira na gadreva dina tiko, me vakataki Vunivesi.

Tomana ni tiko e na matabose e so na i vakalesilesi ka dau nodra i tavi me ra dau la�ki vakadikeva e so na vuvale vaka oqori, ka sa qai mai bose e dua na komiti me ratou na qai vakatulewataka na kena vakadonui se sega.

E na vakatau oqori mai na i tuvaki ni vale e tawana tiko, na gaunisala ni rawa i lavo nei taukei ni vale, kei na i wiliwili ni matavuvale.