KEIMAMI sa oca na rogoca tiko mai na vosa oqo ni dau isau ni taro, ?E na qai qaravi?

Ninaica beka li, me na qai cakacakataki kina na kena qaravi? Oqori na i cegutaro levu ka ora tiko kina na lomai Eneriko Nakelekelevesi na turaganikoro ko Naraviravi e na Tikina ko Nayaulevu, Saivou e na yasana o Ra.

E a gole mai e na neitou valenivolavola na turaga oqo e na macawa sa oti me mai vakamacalataka na dredre levu era sotava tiko na nona lewe ni koro ko Naraviravi, Navuniyamunu kei Naivutu e na vuku ni gaunisala.

Sa oti mai oqo e va vinaka na vula na neimami taubaletaka tiko e rua na kilomita, me tekivu mai na koro ko Nayaulevu ka vakadodonu sara ki na neitou koro ko Naraviravi.

E vakadeitaka na i tukutuku oqori ko Nakelekelevesi ni ra sa oca mai na wawa.

Kuria o Nakelekelevesi e na nona i tutu vaka turaganikoro, ni sa rui lomani ira vakalevu na nona lewe ni koro e na vuku ni taubale era cakava tiko e na veisiga.

?Na gauna oqo, na basi e yaco sara tiko ga i Nayaulevu, ka sega tale ni qai toso e na vuku ni sisi ni gaunisala.? 

?Sa oti mai oqo e vica na neimami Bose ni Tikina, ka tukuni tiko ga vei keimami ni na qai qaravi, ia na qai qaravi oqo, e sa oti tale mai e va na vula, na neimami taubaletaka tiko na rua na kilomita! De caka tiko na walkathorn,? e kaya.

Tomana o Nakelekelevesi ni sa dua dina na ka vakaloloma ni dau tau na uca me ra qai colacola cake tale na nodra i yaya na lewe ni koro ki nakoro.

?Kevaka keimami lai volivolitaki ki Rakiraki, keimami na colacola sobu na neimami i voli ki Nayaulevu ka la?ki waraka e keya na basi se na keria.

Kuria ni o ira na gonevuli kei ira na nodra i tubutubu era taubale e na veimataka ki Nayaulevu, vodo e na basi, ka taubale lesu tale e na veiyakavi.

Sa vakamamasu tiko yani o Nakelekelevesi ki vua na noda Paraiminisita kei iratou na lewe ni nona matanitu, kei na Minisita ni Veilakoyaki e vanua mamaca ke rawa ni bau ra nanumi na wekada era sotava tiko na dredre e na gauna sara ga oqo.