Update: 10:43AM E dua nai soqosoqo esa kilai levu tiko ena vuravura taucoko ka vakatokai ena vosa vaka Peritania na �Slow Food Movement�. Na �Slow Food Movement� e vaka uqeta na noda railesuva nai walewale ni teitei ka ra kilai levu kina na tubuda ka maroroya na dela ni vanua kei na yaubula raraba ka na maroroi keda talega.

Ena gauna sa da lako curuma tiko oqo e sa levu na vakayagataki ni wainimate ni co ca ka sa vakavuna mai na dravudravua ni noda dela ni vanua. 

Nai soqosoqo ni �Slow food� e sa bolea vakalevu na noda vakasama ena kena sagai me vakalesuya tale mai na sautu ni noda vanua kei na noda kania ga na veidraunikau kei na vuata ena kena gauna dina ga. 

Sa cakacaka tiko vakaukauwa nai soqossoqo oqo ena veiyasai vuravura taucoko na kena valuti na vakayagataki wainimate ni co ca. 

Ni da vakayagataka na waini mate ni co ca eda sa buita tiko na paisoni ena noda dela ni vanua ka rawa tale ga ni vakaleqa na noda bula vaka tamata – tabu saka yani.

Nai soqosoqo na �Slow Food� e vakauqeta tale ga na kena qaravi na cakacaka vata ni solesolevaki ka ra kilai tani tu kina o ira na tubuda.

Ena draki ni bula vakamakete  eda sa lako curuma tiko oqo sa vinakata na dauteitei me totolo nai tei ena vuku ga ni gadrevi vakalevu nai lavo me sotava na gagadre ni bula ni veisiga. 

Mai na cakacaka oqo e sa vakayagataki kina vakalevu na wainimate ni co ca ena veiteitei. E da sa sega ni wereca ka vakatawa ia eda sa vakayagataka na wainimate me totolo na cakacaka. 

Eda biuta i gusuda na veika eso, me kua ni da ceguva na wainimate baleta ni tiko kina na paisoni. Ke sa da kila ni tiko kina na paisoni na cava sara mada eda vakayagataka kina? 

Na veiveisau ni draki eda sa vakila tiko ena gauna qo e vu ga mai vei keda na tamata – tabu yani, ena nodai vakarau ni cakacaka eda qarava ena noda dela ni vanua se �Human activity� vaka Peritania.

Eda sa yacova mai edua na dela ni gauna ka sa yaga sara vakalevu meda na taroga �Na cava eda via biuta tu mai vei ira na luveda?

E ra kilai na tukada ena nodra yalomatuataka na qaravi teitei ena kena dela ni gauna me vaka na nodai vola ni vula vakaviti:

Vula i Werewere  – Qo na vula edau wereci kina na qele ka dau dreu talega kina na vuata me vaka na kavika, wi kei na so tale.

Vula i Cukicuki  – vakarautaki na qele ena vei tei eso me vaka na uvi

Vula i Vavakada  – na vula edau vagolei kina na itei ni uvi ki na vanua me sala kina ka tadrava yani vakavinaka na siga.

Vula i Balolo Lailai Okotova] – Na vula era dau takasa kina na balolo ena dela ni so na veicakau ka dau vua tale ga kina na uto ka rawa talega ni vakayacori kina na tei kawai.

Vula i Balolo Levu – na vula edau levu cake sara kina na kasa ni balolo ka dau levu talega kina na jaina kei na Tivoli.

Vula i Nuqa Lailai  tekivu me sa vakilai tiko mai na cabe ni ika.

Vula i Nuqa Levu  E sa levu cake mai na ika ka vua talega mai na moli.

Vula i Sevu  – yaco na tatamusuki ka dau sevu kina na vua ni qele vei ira nai talai ni kalou kei ira talega na noda turaga/marama.

Vula i Gasau  – levu mai na gasau ka rawa ni vakavoutaki eso na vale se taravou tale eso.

Vula i Doi  – vula edau se kina na doi ka dau dreu talega kina na tarawau

Ke da vakamuria vinaka nai tuvatuva ni teitei ena kena gauna dina ga ka ra dau kilai tani kina na tukada au vakabauta ena kune tiko ga vakalevu na sautu ka ra na vua vakalevu na vuata ena kena gauna donu ga.

Sa bolei sara kina vakalevu na noda rai ena dela ni gauna qo kau na taroga tale na taro – se cava sara mada eda via biuta tu mai vei ira na noda kawa muri mai?