Search

Kau lesu mai na mataveilewai i Taukei

AU vakabauta ni se sega ni laurai rawa tiko na leqa sa tara tiko na kawa i taukei e na gauna qo, vakabibi e na kena se sega tu ni ra buli na veituraga bale ni noda vanua ka sa sagavulu mai na yabaki qo, ka so e drau sara, na basuki ni lewa ni bose vakoro wili kina na tabu ni wai kei na veika e taukeni levu, lailai na i teitei, toso cake na kerekere, levu na dravudravua kei na vakaloloma, au vakabauta ni sa dodonu me sa vakayacori mada e dua na (review) e na cakacaka ni tabana oqo, ka wili kina na kedra dikevi tale mada na wasewasei ni tavi e ratou qarava, ka vaka kina na kila se experience ni bula vakai taukei.

Me?u tomana na Mataveilewai Taukei, au via vakaraitaka ni na kena tosoi tikoga na gauna me na lako mai kina na mataveilewai qo, e sa na qai lutu sobu tikoga kina na i vakarau ni bula ni taukei e na veikorokoro e na noda vanua, kau a sa vakayacana oti tu e na dua na gauna me sa koro ni vakacegu se ?retirement village? baleta ni sa lutu sara na qaravi tavi ka ra lewe levu sa digitaka me ra sa laurai ga vakalevu e na koro, se vale ni soqo, ka vakalailai e na i teitei.

Au via vakaraitaka tale tikoga ni na dua na siga e ra na veiveisau na i dabedabe nodra na dabe tiko e na noda Tabana qo ka ra na qai veivutuni ni ra a sega ni vakaitavi e na kena cakacakataki na lawa i taukei kei na kena mataveilewai.

Sa dodonu gona kina ni ra se cakacaka tiko e na gauna dredre e da sa donuya qo na i taukei, me sa vakayacori rawa e so na veisau e na i vakarau ni cakacaka ni noda qaravi na i taukei, ni se bera ni qai tosoya cake na matanitu veiliutaki na noda butuki, ka da sa na qai kui vakadua e na ruku ni yavu ni vakavulewa ni 2013.

Eda sa vakavinavinaka vakalevu ni sa computerize-taki na VKB, au vakabauta ni sa na qai vo me na caka vakamatau na website ni Ministry e tu kece kina na veitavi kece sara (functions) kei na i vakarau ni cakacaka (procedures) me da kila na lewe ni Vanua ka na vukei keda tiko e na kena vakatotolotaki na veika e da gadreva ni da sa vakadodonu saraga e na kena tabana donu. Vakabibi na i tuvatuva ni cakacaka e sa vakamacala tiko kina na tabana ni Veitarogi Vanua.

Au vakabauta talega ni dina ni sa qaravi tiko eso na i tavi lelevu wili kina na Fijian Dictionary.

Na ka baleta na i lavo musuki ni niu, climate change, na vuli kei na vuqa tale na cakacaka, au gadreva meu raica me soli talega vakalevu na gauna, i lavo kei na i gu, e na tabana ni kena kau lesu mai na lawa i taukei kei na mataveilewai ka dua tiko na ka e vakatokai e na vosa vakaperitania, na nodratou ?core functions? na Tabana ni Taukei ka na tara ka vakavinakataka sara ga na ?bula e veisiga? ni taukei e na veikorokoro.

E na qai kuri tale yani.

E a liutaka tu e liu na tabana ni vakalawa ni Tabacakacaka ni Taukei ka a rawata na nona koroi ni (1) Bachelor of Laws – Bond Uni; (2). Master of Laws – Queensland University of Technology – 1996 kei na (3). Master of Business Admin mai USP e na 2008. E na gauna oqo e sa saga tiko na nona koroi ni PhD ena Extent of the Recognition of Customary Law in Fiji.

Na veika e cauraki e ke e nona vakatabakidua ka sega ni oka kina na Nai Lalakai.