SA lailai mai na kakana e sa volitaki tiko e na veisitoa lelevu kei na veisitoa tale eso ena veikoro lelevu vakavavalagi kei na taudaku ni koro vakavavalagi ni oti oqoa Cava o Winston.

Sa vakaraitaka na vakailesilesi ni Matabose ni Dauvolivoli o Premila Kumar ni sa yaco yani vei iratou na kudru kei na kauweai mai vei ira na lewenivanua dauvolivoli ni sa laurai tiko e so na sitoa e sa lala no na kena vatavata.

Kaya o Premila ni laurai e levu na sitoa era lala tu oqori na kena vatavata e sa yali kina na kakana me vaka na pateta, garlic, falawa (2kg kei na kg), waiwai, masimat, dhal, bisikete kei na suka.

Ia, e kuria ka kaya nira vakaraitaka tiko yani na veisitoa oqo ki na Matabose nira sotava tiko na dredre e na kena vakatawnai tale na nodra vatavata mai na levu ni gagadre vei ira lewenivanua.

E na vica na siga sa oti era sa vakadinadinataka tiko na veisitoa ni dua na i wase levu ni lewenivanua era sa volia na kakana e gadrevi vakalevu e vale me vaka na falawa, wsai, tin ika, sucu, pateta, ti, bisikete, kuvu ni namu, bateri, kadrala, masese kei na so tale.

Eso na matavuvale era sa volivoli sara vakalevu mera maroroya rawa tue vale.

Kaya o Premila nira sa volitaka talega vakaumauma na kakana ki na veitabana vakamatanitu, tabana ni veivuke, veisoqosoqo, soqosoqo lewe ni lotu kei nai lawalawa ni veivuke tale eso me votai vei ira na vakaleqai ena vakacaca ena tara na noda vanua.

“Sa dodonu mera na namaka na lewenivanua na gauna dredre oqo me vaka ni na lailai se berabera na kena vkaatawan itale na vatavata ni kakana.

“E lailai tale tikoga na pateta e na noda vanua ka sa vakadeitaka o ira na vakau pateta tiko oqo mai vanuatani ni sa vakau tiko mai nai usana, ka so era se waraka tiko na kena vagalalataki mai na Biosecurity Authority of Fiji,” e kaya o Premila.

Kuria ka kaya ni dodonu me da na namaka na lailai ni kakana draudrau, kakana dina kei na veikakana tale eso e na noda makete.

Sa veivakasalataki talega na Matabose vei ira na lewenivanua mera wanonova matua tiko na i sau ni yaya me vaka nira na rawa ni vakatubura eso na i taukei ni sitoa, ia, ka mera tukutuku sara yani vei iratou.