NA bibi ni loloma ena bula vakawati

E na macawa rua sa oti, eda a veitalanoa tiko e nai matai ni yavu ni bula vakawati vinaka, sai koya na veidinadinati. Ena macawa oqo eda sa na tara kina na kenai karua, sai koya na loloma.

Au a tasereka yani e na dua na tabetabe sa oti, ni dodomo sa dua tiko vei iratou nai wasewase ni loloma.

E tolu tiko nai wasewase ni loloma.

E tiko na loloma Vakalou na ?agape? ka sega ni vakaiyalayala, sega ni vakadirideini ka sega tale ga ni vakadraki se vakatautaki ki na ka e yaco se tiko ka ni sai tuvaki ga ni bula na loloma.

A kenai karua sai koya na loloma vakaveiwekani se vakaveitokani ka vakatokai na ?philia.? Na kenai katolu sa okoya na ?erotic? se na loloma ni dodomo.

Na loloma oqo e loloma ni veidredreti ni dua na tagane kei na dua na yalewa.

E dau buroro taumada ena gauna ni tabagone (teen), e dau kamikamica, veimositi, e rawa ni dau katakata na kena buroro ka rawa tale ga ni kacabote ka vakatubu leqa kevaka e sega ni lewai vakamatau.

Na Kalou levu ko Jiova sa vakaitikotikotaka na gagadre oqo ena loma ni bula vakawati ka vakatulewa talega kina ni vakawati me sa ka ga ni lewe rua, aya e dua na tagane kei na dua na yalewa, me rau tekivutaka ka rau qai vakacavara sara ni rau sa dui mate.

Ia na leqa e koto sa o koya e dua nai wase levu ni tagane kei na yalewavakawati, era sega ni tarovi ira ka ra vinakata me ra taura taucoko na galala ni nodra vakatulewa me ra vakayacora na veika ga era vinakata ka sega kina ni ka bibi vei ira na duavata ni veiwatini.

Sai kina ni kevaka sa via vakawati e dua, sa dodonu me digitaka sara vakavinaka o koya me watina, me sa vakatulewa talega ni rau na vauci vata vakadua me yacova sara na mate.

Na ka oqo me sa vakatulewataki rawa ni bera na vakawati. Ia na digidigi oqo me vakatulewataki vakavinaka ka me kakua ni ka ni gagadre ni dua walega na gauna lekaleka, ia, me sa vakasamataki sara vakayalomatua ka ni sa ka ni bula taucoko.

Ena loma ni Lotu Vakarisito, eda sa vakabauta dina sara ni veidinadinati ena loma ni vakawati, e dodonu me curuma koto na loloma titobu ni Kalou, na ?agape love.?

Na loloma oqo e tovure mai lomaserena na Kalou vakataki Koya, esa drodro tu vakayauyau ki na bula ni tamata, ka salavi rau na veiwatini me yavu ni nodra bula veilomani vakataki rau.

Me vaka ni da a buli me da veiucui kei na Kalou, sa vonoti koto e na noda dui bula yadua na loloma oqo.

Ia kevaka eda sa solia oti na noda bula vua na Turaga, e sega tale ni qai vakataratutu ni draki ni loloma oqo e dodonu me sa tiki sara ga ni noda bula.

Sai tavi ni veiwatini yadua, aya na tagane kei na yalewa vakawati me vakadeitaka koto na yalo ni loloma oqo me tiki tiko ni nodrau bula e na veisiga.

Na loloma oqo sa mai vakatakarakarataki vakavinaka e na bula nei Jisu Karisito, o Koya nai Loloma ni Kalou ka lolomataki vei keda e na Siga ni Sucu, ka tiki ni nona bula e na veisiga e na gauna a mai bula kina vakatamata.

Ena loma ni yabaki tolu ni nona cakacakataka nai naki ni nona lako mai e na vunau kei na cakacaka mana (ministry), era vakila na tamata kecega na talei ni loloma oya, na loloma e veitarai, na loloma e veivakabulai, na loloma e siro, na loloma e veikauwaitaki, na loloma e veilaveti, na loloma e veidokai, io na loloma ka sega ni vakaiyalayala, na loloma e sega ni digidigi se vakadirideini, na loloma e sega ni vakadraki se vakatautaki, e drodro ga vakayauyau vei ira na tamata kecega e na gauna kecega.

Era kauwaitaki ka vakabulai na dravuadravua, ko ira na vukavuka, na mate sara, na wamalai, na galu kei na didivara ka ra vakatucaketaki na mate, dina ga ni ra sega ni veiwekani se veikilai mada ga – ia sa tarai ira kece yani na loloma ni Turaga.

Me lai yacova ni ratou vakanadakui koya na nona tisaipeli, e volitaki koya ko Jutasa, cakitaki koya ko Pita ka ra vakacacani ka vakasewasewani Koya na Jiu kei na kai Roma, e se kerei Tamana ga me vosoti ira.

Oya na loloma ?agape? me tiko vei kemudrau na veiwatini. Me vaka ni da tamata ga ka tu kece na noda malumalumu, e na vosa, nai tovo, ivakarau ni vakasama kei nai valavala, e na yaga me tiki tiko ni noda bula na loloma Vakalou oqo me rawa ni da toso kina ki liu.

Eso vei keda e qai veicalati ga vakalailai na veivosaki se lauvidi ga na taukuku ni yavadra, se laukini na belebele ni daligadra, era sa gusususu veibiu tiko ka so sa vakasosolo sara mera biuta nodra vale ni vakawati.

Na veidinadinati e na loma ni vakawati ena sega ni vakatara na draki vakaoqori ka na vosota toka na dredre kei na bibi ni colacola.

Ia e na dau tu vakarau talega me vakaraitaka vakadodonu na lomana.

Na loloma kei na veidinadinati ni vakawati e tekivu main na siga erau sa veitalanoataka kina na lewe rua ni rau san a vakawati ka rau tadolova vakamalua na veisiga yadua me rau raitayaloyalotaka na bula erau n alai bulataka, yacova yani na siga ni vakamau ka toso vata kei na veisiga, veimacawa, veivula kei na veiyabaki ni bula vata e na loma ni vakawati.

Kevaka erau sa cauravou se goneyalewa vakabulai, sa na rawarawa sara me rau vakavatukanataka na veiwatini na kena bulataki na loloma e na loma ni nodrau vakawati.

Na loloma sai koya na itini (agent) uasivi duadua ni nodrau veiwekani na veiwatini.

E vaqaqatataka nodrau veidinadinati ka rau rubu cake vata tiko kina e na gauna taucoko ni nodrau bula vakawati.

E ka bula na vakawati. Na ka bula kece e dodonu me tubu. Na kena vakani vinaka ga e dua na ka bula,na kena tubu bulabula talega.

Na loloma sai koya na kakana bulabula duadua ni dua na bula vakawati vinaka.

Na loloma oqo e dodonu me kune tiko ena loma ni vale ena veika rawarawa ka tiki ni bula ni veisiga.

Na loloma oqo e basika ena gauna erau bula veirogorogoci ka veirokorokovi kina na lewe rua.

Na loloma ka vakataudeitaka tiko na duavata ena loma ni gauna ni duidui ka dreti rau vata mai ki loma na veiwatini me rau kere veivosoti ena sala malumu ka daumaka.

Na loloma oqo e Tekei koto ena bula yadua ni tamata ka sav o ga meda vakayadrata ena noda cakacakataka.

Sa solia tu vei keda na Kalou na loloma oqori meda bulataka ena kena taucoko, ia e ka ni rarawa ni lewe vuqa era vakasabusabutaka ka ra vakayagataka mei vakarawa ni lomadra.

Eda na sotava e vuravura na dredre kei na rarawa, e sega ni rawa ni sega. Ia me da taura na loloma Vakalou me vakadeitaki keda ni da curuma yani na dredre ni veisiga nimataka.

O koya ga e vakadeitaka na nona lomana na Kalou, san a vakaliuca talega na Turaga me vakadeitaka na nona bula vakawati.

Me vaka au a sa cavuta oti mai cake, na Kalou eda vakabauta sa Nonai tovo ga na loloma kei na dina.

E kaya kina ko Joni ena Joni 1:14, ??keitou a raica na Nonai ukuuku ni sa vaka na Le dua bauga sa vakatuburi mai vei Tamana, sa sinai ena loloma kei na dina.?

Na loloma oqo e dua na ka taucoko ka kovuti kina e vica vata na ka bibi me vaka e dusia na 1Korinica 13:4-7:

?Sa dauvosota vakadede na loloma, sa yalovinaka na loloma, sa sega ni vuvu na loloma, sa sega ni vosa doudou na loloma, sa sega ni viavialevu na loloma, sa sega ni cakava na ka sa sega ni kilikili kaya na loloma, sa sega ni qara na ka me nona ga na loloma, sa sega ni cudrucudru na loloma, sa sega ni daulomaca na loloma, sa sega ni rekitaka na ca, ia sa rekitaka na dina na loloma?

E levu sara na vuvale e mai kavoro ni ra sega ni tiki ni bula vakawati na iyau talei ni loloma ka ra tuvai koto oqo e cake.

E tubu kina na veibeitaki, veivakanananucataki, dui caka nona, ka yali na veidokai kei na veilomani.

Raitayaloyalotaka mada nai rairai ni dua na bula vakawati ka sa vuabale kina na loloma kei na dina Vakalou ka savu yani ki tutu ka ra raica maina tani na kena talei ka bau tetevi ira yani me vu ni dei talega vei ira.

Sa noqu masu meda tauyavutaka noda bula vakawati ena loloma kei na dina Vakalou, meda rawa ni sotava kina na bula vakaikanakana ka vakaibalebale me vaka a virikotora taumada na Kalou e na loma ni vakawati.