NA solesolevaki sa i koya ga na i tukutuku era vakarairaka nalewe ni koro o Rokoroko e na yasana o Ra ka vakataucokotaka tale na nodra bula ni oti na ravuravu ni cagilaba o Winston.

Era a cakacaka vata na lewei ni koro e na kena tarai cake tale na nodra vale ka ra vakacavara rawa e dua na vale e na loma ga ni tini na siga.

E kaya na turaganikoro o Eparama Nalawa ke a sega ni vakavatukanataki na tarai ni nodra vale ke a sega na veivuke ni ?Help for Homes?.

E kaya o koya nira marautaka vakalevu na nodra lomavata na lewe ni koro mera cakacaka vata e na ena tara tale na vale.

Rauta nira lewe 126 na lewe ni koro e Rokoroko ka nodra i vurevure ga ni rawa i lavo na teitei. Mai na 26 na vale e dabe toka e loma ni koro, era a vakacacani ga vakalailai e 17 na vale ka ciwa e vakcacani sara ga vakadua.

Tomana ka kaya o Nalawa ni ciwa na vale ka vakacacani oqori era a vukei mai na $7,000 e-card ka vakarautaka na matanitu.

Ni oti na bose vakoro, e kaya o Nalawa, e a vakadreta vei ira na lewe ni koro na kena gadrevi mera cakacaka vata ka mera tara na vale ka rawa ni vorata na cagilaba.

E kaya nira sa vakacavara na i matai ni vale, ka ratou veivuke kina na lima na matai era lewe ni koro ka ra na tomana tiko na nodra cakacaka vata ena kena tara na vo ni walu na vale.

E kaya o Laisenia Waqanivanua, e dua vei ira ka vakagolei vei koya na veivuke ni Help for Home ni marautaka na tawana na nona vale vou.

Kaya o Waqanivanua ni ratou a vakayalia taucoko na nodratou i yaya na lewe ni nona matavuvale e na cagilaba o Winston, kevaka me a sega na saaga ni Help for Homes ke a sega ni rawa e dua na vale vou.

Tomana ka kaya ni va na macawa era a tiko vata ga ena loma ni vale vakoro, ka ra sa vakanamata tu mera curuma na nodra vale vou.

E vakaraitaka talega na peresitedi ni Soqosoqo ni Marama e Rokoroko o Elena Navuwaku nira sa vakanamata tu na marama mera na tara cake tale na nodra bula ena veisiga.

Ia, e tinia o Nalawa ka vakaraitaka na nona vakavinavinaka levu vua na i liuliu ni matanitu o Voreqe Bainimarama e na vuku ni veivuke levu oqo ka sa vakauqeti ira mera cakacaka vata kina de na vuku ni tiko vinaka.