E VAKARAITAKA ko Sekonaia Kalou,e dua na lewe ni timi ni BLK Nadroga ni dodonu me na vakavinakataka nona sikaramu o Nadroga ni se bera nodrau na veidresuqanibulu kei Suva ena fainala ni bilo na Skipper ka na vakayacori tiko ena rara e Laucala e na Vakarauwai oqo.

Oqori ni oti nona mai qaqa o Nadroga ena 21 kei 15 vei Naitasiri ena i karua ni semi-fainala ni bilo ka a vakayacori e Lawaqa ena Vakarauwai sa oti.

Dina ni a mai qaqa o Nadroga, ia, e a vakaraitaka o Naitasiri na kaukauwa ni nona sikaramu ena kena a laubili vakalevu tiko na i yatu e liu ni timi ni Nadroga.

E a tabaka rawa o Nadroga e rua na sikoa mai vei Eremasi Radrodro kei Joeli Lutumailagi ka vica kena caqe ki matamata mai vei Alivereti Veitokani kei Mitieli Nacagilevu, ia, e kaukauwa nona tataqomaki ka seva kina vei Naitasiri me takosova rawa na nona laini ni sikoa o Nadroga ka tolu ga na i totogi e a caqeta curu nodratou fulubeki o Etonia Rokowailiwa.

?Au vakavinavinaka vei iratou na turaga naita ena nodratou mai vakaraitaka vua na timi ni Nadroga na vanua e malumalumu kina.

?E sega ni rawarawa na qito vata kei Naitasiri, ia au vakavinavinaka vei iratou na cauravou nodratou sotava na voravora mai tai kadua, sega na soro ka rawati na qaqa.

?Na sikaramu e dua na vanua keimami na vakavinakataka ni se bera na sota kei Suva baleta na timi ni Suva au vakabauta ena via tautauvata kei Naitasiri na kaukauwa ni sikaramu e toka vei rau,? e tukuna o Kalou.

E veitokoni mai kina o Frank Bouvert, na turaga ni Varanise ka sa dau veivuke toka ena rakavi e noda vanua.

?Au vakabauta ni a tiko vei Naitasiri na bi me vaka nira tiko mai kina e so na tamata lelevu me vakataki Jerry Naureure, Joeli Veitayaki kei na vica tale ka vu ni kena laubili tiko o Nadroga ena sikaramu ka dua na vanua oqori e dodonu me ratou na raica vakamatua sara na timi ni Nadroga ni se bera na sota kei Suva ena fainala,? e tukuna o Bouvert.

E tukuna tale ga o Talatala Joji Rinakama ni sikaramu e dua na vanua e dodonu me na vakaukauwataka o Nadroga ni se bera na qito kei Suva ka kuria ni a rarawataki iratou na nona i yatu e liu ena gauna ni veimulomulo.

?Na gauna e dodonu me ratou cici vakadodonu kina ka basuka na tataqomaki ni Nadroga ena kena sa mamare, eratou qai solia tiko na polo vei iratou na i yatu e muri na vanua e kaukauwa sara kina o Nadroga ena tataqomaki,? tukuna o Talatala.

Ia, e tukuna o Penisoni Waki na Match Commissioner, ni dau duatani ga nodrau qito o Naitasiri kei Nadroga.

?Dina ni a soli e vica na pepa dromodromo, ia, oqori me dau namaki ena mataqali qito vaka oqo ni rau sota tiko e rua na timi ni vanua,? e tukuna o Waki.

Na tikina oqori e a vakadinadinataka o Namosi e na noderau semi-fainala kei Suva ena yakavi ni Vakaraubuka sa oti e na kena a tabaki e tolu na sikoa mai na nodratou basuka na nodratou bai ni tataqomaki mai na i yatu e liu ni Suva.

Ratou tabaka na sikoa oqori o Vularika, Mulevoro kei Mosese Baravilala me nodratou kina na lagilagi e na 35-18 vei Namosi.