Bibi ni noda tiko donu

E LAURAI votu ena soqo ni veibuli mai Tubou ni donu na tiko vakavanua, e matata na vakaturaga.
Era a maqusa, vakavakarau, vakasosolo ki Lakeba ena loma ni rua na yabaki ka qai la’ki vakavatukanataki Ki Nayau,Tubou kei Sawana ena Jiulai 6 kina Jiulai 11.
Na soqo lagilagi vakaturaga qo e vakacokotaka sara ga na vanua. Ena loma ni 21 na yabaki ena kena sa lala tu na itutu vakaturaga sa basika kina e levu na tamosa ni tiko vakavanua.
Ia sa lagilagi na nona dau veisiviraki na Kalou. E mosimosi, veivakatovolei, veivakayavalati, veibolei ka veivakavulici.
E tukuni vei au mai Tubou ena soqo ni veibuli mai vei ratou e lewe tolu na noqu itokani, ni sa vakatovolei dina na nodratou bula ni veiliutaki vakacakacaka mai Suva ena wawa (“the full installation process from the church service followed by the vakavanua at the chiefly grounds really tested their patience of waiting in silence for hours”.) E ratou qoroya nodra dabe galugalu ka wawa ena todra ni siga na turaga kei na marama.
Era solia na kedra na medra nodra iyau kei na gauna. “Kari bagi qo na vakaturaga,” a cauraka e dua vei ratou.
Era dau galu ka wawa na lewenivanua ni ra dagava cake toka na itikotiko vakaturaga ena nodra veivakabauti ni tiko kina na lewa matau ni veinanumi ka veimaroroi qai veivakacegui.
Na irairai ni vakaturaga qo e gasagasa ni da sarava qai matanataki ena gu ni cola vanua.
Mai Tubou ena soqo ni veibuli e matanataki ga kina na iyaloyalo ni vinaka. Ni da tu vata na veiwekani vakaitaukei e sega ni dua na ka e dredre.
O ira e nodra na veiliutaki vakavanua me ra sa qaravi Kalou vinaka sara ga me rawa ni na matua kina na nodra vakatulewa dina dodonu qai savasava.
O ira na lewenivanua era sa via vakaturaga tikoga. Sa bibi kina na veiliutaki me vakatawa vinaka na lololo ni nona veiqaravi.
O ira era dodonu me ra vosa ka veivakadodonutaki me ra vosa me na kua kina na veikalawaci. Na lewenivanua me kila talega na nona iyalayala ka kua ni via kisira na nona iyalayala ni tiko vakavanua.Ni dau basika qo e dau kauta mai na sigani ni bula sakasaka, lecaika ka vakaloloma.
Ni da dui toka ga ena noda itutu vakavanua e matata qai vakaturaga ka totoka ni da vakasarava.
Vinaka vakalevu sara na vanua o Natuicake na veivakayavutaki ena noda Viti.
Na buca ni sui mamaca sa tara tu na noda veitikotiko vakaturaga sa vunauci qo me vakabulai tale me sa vakalewena, vakaduri ka soli vua na icegu ni bula va-Kalou me tucake ka veiqaravi yani.
Ni tu vata na vanua ena sega ni dua ena rawati keda ka na rusa na meca.
Na Bose Levu Vakaturaga me sa vakaiyaragitaki vinaka me rawa ni na dusi sala vei keda ka maroroya na vanua me kua ni vakayagataki mai vei ira eso me baleti ira ga. (Jeremaia 22:29 “Iko na vanua na vanua na vanua, mo rogoga na vosa i Jiova.”)
Na Kalou me liu me laurai ka me cecere ena nodra veitikotiko vakaturaga e Viti.
Ni kalougata tiko na noda.