Esa koto tale oqo e ra eso na noda vosavosa makawa ka ra sa biu ka sega ni vakayagataki tu ena gauna nikua, ena vuku ni veisau ni gauna kei na kena cabe talega mai na lotu ka lako vata mai kei ira na italatala ka ra vakayagataka vakalevu na vosa vaka-Toga me muria yani na vosa vaka-Viti.
Era cakava beka ena gauna oya ena nodra raica me rawarawa na kena vulici ka volai na vosa vaka-Viti ena vakadewa vaka-Toga mai na Fa ki na Va me vaka eda sa taurivaka tu e daidai e levu sara na vosa ka vaka-Viti ga ni vaka-Toga.
Ia, e tiko e levu sara na vosa makawa ka sa biu ena vuku beka ni dredre ni kena volai se cavuti ka a tabaki ena 1850 ko Danzel Hazlewood e dua na vavalagi, ni wiliwili sara mada yani.
- Buroga — na nomu sega ni via solia na ka vua e dua e kerea. Na vosa qo vaka me sa sega tu ni qai vakayagataki vakalevu.
- Cadruti — na kena cavuka na wa se vakayagataki tale ena dua na ka e tasere.
- Cauna — na ivovo ni kakana ni oti na nona kana e dua ka qai vo tu.
- Ce — malumalumu ka sega ni rawa ni vakayacora na ka e nuitaki kina.
- Cogecoge — ni o cudru ena kena vakatarogi vei iko e dua na ka.
- Dadaweruweru — na kena vakasaqari e dua na ka ka yacova sara ni matailalai.
- Dave — na kena drodro na wai se dua na ka e vaka na wai.
- Vakadiva — na nomu vakamamacataka na wai se dua na ka e vaka na wai me yali na suasua.
- Dokobea — na duka se soso ena kuli ni yago ka vu mai na sava ni yago ena soso.
- Gusuwa — dauvosa.
