E KILAI vinaka o Moturiki ni se sautu vinaka e na i tovo kei na bula vakaivakarau.
E vakatalega kina na veika e ologi koto kina e na loma ni vanua ka semati ki na tawa vanua taumada mai vei ira na vuda e na nodra veitosoyaki.
E na dua na delana volekata na koro o Nasauvuki e koto kina e dua na yavu ka matata vinaka ka vanua tautauvata.
Kaya o Asiki Nasa Waqa, yabaki 27 ni oqori na yavu ni koro o Benau. Rau toka veitaravi vata kei na yavu o Beqa ka toka vakalailai yani ki cake.
Ko Waqa e cauravou ni koro o Yanuca e dua na yanuyanu ka ciri voleka toka ga e Moturiki, na nona yavusa o Navuti-i-Wai, nona kau na Navadra, Mataqali o Nakoro nona kau na Bokasi ka nona ika na Matu.
Na i talanoa e baleti Benau au a rogoca mai vei tukaqu o Savate Cagilaba ka dewa sobu mai na kena vakadewataki mai vei ira na tukaqu sara mai liu me yacovi au mai, e kaya.
Au kalougata niu vakamuri tukaqu voli ka mani vakadewataka mai vei au na i talanoa me baleti Benau.
E na dua na veitalanoa kei Waqa, a vaka koto oqo na veika e a cauraka me vaka na i talanoa e a vakadewataka na tukana o Cagilaba.
E na dua na gauna e ratou a gole ki wai na kai wai nei Tui Rukua.
Oti e ratou sa lesu mai ratou na kovu ni vakalolo ni sa ciri yani. Ni ratou sa cabe ki vanua e ratou sa rogoca ni sa laukana na kedratou kakana.
Ratou sa qai cudru.
Eratou sa mani kaya vei Tui Rukua qai vakaqara na nomudou kai wai.
Keitou sa vaqara na neitou turaga na kai wai.
Oti ratou sa qai soko ki na muaira ratou curu cake e na kedrau veimama na Yatu Yasawa kei Viti Levu, ratou gole cake ka donui Udu Poidi ratou sa raica nira caka kakana tiko e baravi e kea e so na tamata.
Ratou mani gole ki vanua, vei iratou e Natewa.
Solia vei iratou na Vunivalu e kea e dua na yanuyanu o Beqa Levu ka ciri koto e na boto ni toba kei Natewa.
Ratou toka vakalailai e kea ratou raica na coco magiti, ia, kerea sa ka ratou sa siqema ni dua tale na turaga levu e tiko mai yasana kadua.
Ratou sa soko ki wai ratou qai donuya e dua na bogi walu , ka ratou qai takasa ki na yanuyanu o Kioa.
Gauna sa ruru kina na cagi sa buluta tu na nuku na nodratou waqa.
Ratou sa qai kauta mai e dua na tolo ni kau me ratou tavoca kina ki wai.
Ratou sa qai mani tavoca ki wai sa qai tagi mai e dua na gone lailai e na tolo ni kau ko ya.
Sa qai tagica na gonelailai me bula.
Ratou sa tukuna vua na gonelailai ko ya na ka e ratou gadreva me bula kina.
Sa qai tukuna o koya me Kalou ni nodratou i yau.
Ratou sa kure tu ga na turaga.
Sa tiko vei keitou na i yau.
Tukuna o koya me nodratou kalou ni wai, keitou sa kai rawa tiko.
Oti sa mani tukuna o koya me nodratou kalou ni valu.
Ratou mani tukuna vua, koya ga oqori e sega tiko vei keitou.
Ratou sa qai vakavodoki koya e waqa ka ratou soko vaka ki Taveuni.
Mani tukuna o koya vei iratou me ratou balaki koya ki wai.
Gauna ratou sa balaki koya ki wai sa qai vuki me qio.
Rua na waqa eratou kauta mai na yavusa oqo, ia, e sa qai vaka toka e i katolu ni waqa na laca ni qio oqo ka sa salavata vata tiko kei iratou.
Sa ra qai vakataroga na gone sa qai ra tukuna na qase qori ga na gone ka tavo e dakuna na waqa.
Sa ra qai vakayacani koya tu me ko Dakuwaqa.
Sa qai dei kina na yalodra na gone.
Sa ra a cabe ki vanua ka ra cabe e mata ni koro e Somosomo.
Sa ra qai toka e Somosomo, sa qai solia vei ira na vanua lala ka toka ravita ka sa yacana tiko nikua o Dreketi.
Na yanuyanu ko Benau sa qai nodra yanuyanu me dau lili kina na nodra i lawa ni qoli. Ni ra tiko e Dreketi sa yaco na gauna era sa lewe levu.
Sa ra qai kerekere vei Tui Smosomo mera sa vaqara vanua tale nira sa lewe levu.
Sa qai kerea me salavata kei ira na luvei Tui Somosomo tagane.
Sa kaya mera lako vata .
Sa ra qai kaya kevaka sa sega ni dua na nodra turaga me sa nodra Turaga o luvei Tui Somosomo.
Sa qai ra bose mera sokosoko vakayarua, me dua na bete ni wai, ka dua na bete ni valu me rau tawana tiko mai na veiwaqa.
Sa ra qai gole mai vaka oqo ki Koro.
Na nodratou gole mai ki Koro sa qai mai tala kina e dua vei iratou ka sa yaco me Tui Vunuku e na koro o Nasau.
Sa ratou qai soko tale ki wai ka vakadodonu ki Gau, e rua tale e rau sa qai tala ki Gau ka rau sa qai vakatoka na vanua e rau sobu kina ko ya me ko Somosomo me i vakananumi ni vanua e ratou sa biuta mai.
Sa ra toso na kena vo ka gole vaka dodonu sara ki Ovalau ra qai vakatoka na vanua era sobu kina me ko Waitovu na nodra i liuliu ka sobu e kea ko Naragavesi, ka dua vei iratou na kai wai.
Oti ratou sa qai soko vaka ki Moturiki , rau sa qai laki tala koto e na dua na yanuyanu lailai ko Yanuca lailai e rua na kawa ni bete e dua na bete ni wai kei na dua na bete ni valu me rau toka e kea.
Sa qai rau gole sobu e na waqa ka vodo tiko o Tui Somosomo sa qai kerei me nona na savuna ni yanuyanu o Moturiki.
Ratou sa sobu e kea sa qai kere na Bete ni wai vua na Tui Somosomo ni sega ni rawa me rau na tiko vata e kea.
O au meu sa vaqara e dua na vibulewa meu sa na vakaitokatoka kina.
Sa qai gole sobu o koya ki na yanuyanu o Qoma ka sa yacana tiko nikua o Taukei na Bulebulewa.
Rau sa qai rau gole na lewe rua ka rau kauta tiko na waqa ki na yanuyuanu o Naviti ki na Yatu Yasawa.
Sa qai vakatoka na vanua ka kasa kina na nodrau waqa me ko Somosomo.
Sa yaco sara ga e kea na nodra i tosotoso na kai wai se na lewe ni yavusa Benau era a gole yani e Rukua e Beqa.
E na gauna oqo e kaya o Waqa ni dua na i bulibuli qele e tiko e Yanuca lailai ka ra vakatoka o ira, oya na bure nei Dakuwaqa.
Ia, e na koro o Savuna, e kaya o Waqa, ni tiko kina na i vakadinadina nona na Tui Savuna ni kai wai na i Taukei Nabulebulewa e na nona mai biuta tiko e kea e na dua na tobu e tiko e na loma ni veitiri e dua na tobu na ika bula.
Oqo e kena i vakadinadina bula tko me yacova mai nikua.
Na yaca talega ni yavusa nei Somosomo mai Taveuni o Draunikau, ia, e vakabula yaca tiko kina o Tui Savuna me yaca ni nona Mataqali o Draunikau, a tinia o Waqa.
