ERA kidroa ka ra sega ni vakabauta vakadua na lewe ni tikotiko e Nasilivata St e Nadera, na veisua vakadomobula ka a vakayacori kina e na mataka e na noa ka vakavuna sara na kena mai kautani na bula ni dua na gone yalewa yabaki 24.
E vakadeitaki mai vei ira na vakaitikotiko e keya ni yaca ni gone yalewa oqo ko Elenoa ka veiqaravi tiko e na dua na matavuvale ni Idia mai kea.
E vakadeitaka o Rasha Ali ni rau qai kidacala ni sa tu e mata ni nodratou katuba e dua na turaga, ka kerea me raici Elenoa baleta me sainitaka e dua na tiki ni pepa ka kauta lako voli yani.
Tomana o Ali ni a tarogi Elenoa tale baleta na vulagi e kila se sega, ia, na gauna vata talega oya e kauta kina na luvena e na dua na rumu ni nodratou vale ka tiko mai muri.
?Na gauna keirau se tiko ga mai kina i na rumu, au sa rogoca na nona qoqolou o Elenoa,? e kaya.
Kuria o Ali ni qai cici mai sa raici koya na turaga oya ni sa vaculaki Elenoa tiko, viritaka koya e ra, ucuna mai e dua na i sele, qai suasualaki koya kina.
Tomana o Ali ni gauna sa suasualaki koya tiko kina, qai yarataki koya e na nodratou mata ni vale.
?Au sa taqayataka de qai curumi keirau mai na veitinani, ka?u mani lokataka na katuba, ni bera niu qiriti na watiqu kei iratou na ovisa me ratou lako mai vakatotolo,? e kaya.
E kaya o Ali ni sa dua dina na i tovo lolovira e vakayacora na turaga oya, e na gauna e sa suasualaki koya tiko kina, qai kamusu beka na i sele, ka taura tale mai na i karua ni i sele ka tiko e na loma ni nona kato tuberi.
Kuria ni gauna oqori e sa sasaga o Elenoa me drovaki koya ka cici ki gaunisala levu.
E kaya o Ali ni oti ga oya e qai cicivi koya tale yani na turaga oya ka sualaka na kesuna, ka sega ni rerevaka ni sa sualaki Elenoa tiko e na matadra na lewe vuqa ka ra vakaitikotiko e kea. Na gauna era sa cici mai kina na tiko volekata na i tikotiko oya, e sa qai cegu na veisua ka dro yani e na nona motoka na turaga oya.
?Na gauna keitou qai yacovi Elenoa yani kina, e sa sega ni qai yavala ka sa vakaloloma sara ga na kena i rairai,? kaya o Ali.
Tomana o Ali ni ratou a qai qirita na ovisa, ka ratou qai yaco yani ni oti toka vakalailai na 20 na miniti.
E kaya talega o Ali ni sa qai cicivaki Elenoa ki vale ni bula na turaga watina, ka sa bera na veika kece ni sa ciba na gone yalewa yaloyalo vinaka oqo.
E vakacaucautaki Elenoa o Raeed Ali na ganei taukei ni vale e na yalo kaukauwa e tiko vua e na nona cici tani mai na nodratou i tikotiko me kakua ni dua na leqa e yaco vei rau na veitinani.
E kaya o Ali ni sa dua dina na gone yalewa vakaitovo o Elenoa, ka dau vakarokorokotaki ira na i taba qase.
?O koya e yadra ga mai e na mataka nikua ka matadredredre, e sega vakadua ni dau karakaralevu, ka taleitaki ira sara vakalevu na gone,? kaya o Ali.
Tomana o Ali ni sega sara ga ni ratou namaka ni na yaco e dua na ka vakarerevaki vaka oya e na siga Moniti.
Ia, e vakamacalataka e dua na lewe ni vanua ka vakaitikotiko voleka e keya, ni veika vakaoqo era dau sarava tu ga e na raitio yaloyalo, ia, oqo e sa veirai sara ga e na matana votu.
E vakaraitaka na gusu ni vosa ni ovisa o Ana Naisoro ni sa vesu tiko e dua na turaga, e na vuku ni veisua oqo, ka na qai tau na kena i totogi ni vakayacori oti na veisele vaka vuniwai.
