E KAYA na Paraiminisita e liu, o Sitiveni Rabuka ni sega ni dodonu me da na taqayataka ni sa soli na kaukauwa kina so tale na tabacakacaka se i vakailesilesi mera na veivesu ena kena sa mai soli talega oqo kina tabana ni FICAC na kaukauwa vakalawa oqo.
?E sega ni ka vou, e sega talega ni ka me da nuiqawaqawa kina na lewe ni vanua. Ke dua e dodonu me rere kina, sa i ira ga era cakacaka tiko vakabutobuto.
?E na gauna madaga oqo, e sa tu na kaukauwa ki na LTA, ka vaka kina vei keda na lewe ni vanua me da veivesu (Citizens? Arrest) se vesu e dua ni tobo ni vakau motoka tu e na dela ni mateni (vei iratou na LTA).
?E tu na kaukauwa vei ira na sotia me ra vesuka e dua na lewe ni vanua e kune ni vakayagataka tu vakatawadodonu nai sulu ni mataivalu, ka tu na kaukauwa vei ira na Navy me ra vesuka e dua e kune ni qoli voli vakailowa e na loma ni noda lomanibai ni yalava ni bula vakailavo ni matanitu (Exclusive Economic Zone),? e kaya o Rabuka ka Paraiminisita mai na 1991 kina 1997.
Ena vula sa oti, e sa mai pasitaka kina na Palimedi na kena sa soli talega na kaukauwa vakalawa vei ira na i vakailesilesi ni Fiji Independent Commission Against Corruption me ra na vesuka e dua era nanuma ni cakava tiko e dua na cakacaka butobuto. Na lawa oqo e sa vakadeitaki ira na i vakailesilesi na kaukauwa mera vesuka kina e dua me vakataki ira ga na ovisa, ke ra siqema ni dua na lewenivanua e basuka tiko e dua na lawa.
E veivakadeitaki o Rabuka ni sega walega ni tiko vei ratou na ovisa na kaukauwa me ratou veivesu, ka sa tu talega na lawa me na vukei ira na i vakailesilesi ni veitabana tale eso ena kena sagai me taqomaki vinaka na vanua o Viti mai na cakacaka butobuto eso. Me vaka e sa tukuna oti o Rabuka ni vakila ni tu vua na kila ka vakanuinui ni na rawata na qaqa ena i tutu ni Peresitedi ni soqosoqo vakapolitiki na SODELPA.
