ERA sega ni kinoca rawa na nodra rarawa na lewe ni lotu Wesele kei na veiwekani lotu va-Karisito e na koro ko Navatuyaba mai Toga Naqavoka, e na gauna e sa vakacabora tiko kina o Leone Naivalu na kamunaga ni vakavinavinaka, e na vukudra na Gone Turaga na Roko Tui Toga e na nodra sa talaca na nodratou i Vakatawa ni Tabacakacaka e na Siga Tabu ni macawa sa oti.
Ena nona vosa ni vakayatuyatu o Naivalu e vakavinavinakataki Vakatawa Yalo Vaqiri kina ka turaga ni koro ko Vunisea, Saivou e na yasana o Ra, e na nona mai veiqaravi tiko e na nodratou koro e na loma ni tolu na yabaki, ka nuitaka ni na la?ki marautaka na nona sa gole vei ratou na yavusa Batikiri e na koro ko Drekena mai Rewa e na nona i lesilesi vou e na yabaki oqo.
E a tekivu na soqo e na siga oya e na dua na masu mai vei Vaqiri, ni bera ni qai tubera na kamunaga e na vukudra na Gone Turaga na Tui Toga o Leone Naivalu.
Oti oya e sa qai vakacabori na i sevusevu, ka gunuvi sara, ni bera ni qai tubera tale e dua na kamunaga o Tomasi Baikeirewa vua na Gone Turaga na Roko Tui Toga ka vakatokai me nona vakavinavinaka o Vaqiri, ka wili talega me nona i tatau.
Ni oti na veiqaraqaravi vakavanua, sa qai vakayacori na i vakayakavi ka ratou vakarautaka na lotu Wesele kei ira na veiwekani e na koro ko Navatuyaba e Toga Naqavoka.
E vakamacalataka o Vaqiri ni sa dua na ka na levu ni nona vakavinavinakataka kina lotu kei na vanua, e na i vakarau cecere e vakayacori vua kei na nona mata vuvale.
Kuria ni e na loma ni tolu na yabaki na nona tiko e na vanua o Naqavoka e vuli sara mai vakalevu e na veika vakavanua, ka dina ga ni toso drakidrakita e na so na veika me baleta na lotu, ia, e vakavinavinaka ga vua na Dau ni Lewa e na nona veivakarautaki ka bolei talega na nona veiqaravi e loma ni koro.
Sa tu na nona vakanuinui vei ira na lewe ni lotu ni ra na tomana tikoga na veitokoni vei koya e mai sosomitaki koya, e na i lakolako vou e da sa toso tiko kina e na gauna oqo.
Ia, e na siga Moniti, era a vakayacora tale e dua na kana ni veitalatala vei Vaqiri kei na nona matavuvale o ira na lewe ni lotu Ekelesia e na Tabacakacaka o Toga, ka ra volia talega na kedratou kakana me ratou la?ki tauyavu kina e na nodratou i lesilesi vou.
E kaya o Vaqiri ni sega vei koya na i yau me dolea lesu kina na veika cecere erau vakayacora vua na lewe ni lotu e rua oqo, ka sa tu ga na nona vakanuinui ni na sobuta na nodra dui mata vuvale na veivakalougatataki mai vua na Tamada sa tabogo.
E na mataka e na noa e ra sa qai kauti Vaqiri ki na nona i lesilesi vou vei ratou na yavusa o Batikiri o ira na turaga ni vanua, kei ira na lewe ni lotu ruarua na Wesele kei na Ekelesia, ki na koro ko Drekena me la?ki tomana tale kina na nona veiqaravi vaka i Vakatawa e na loma tale ni tolu na yabaki.
E kaya o Vaqiri ni sa dua na veivakalougatataki levu e ratou sotava kei na nona matavuvale e na nona mai tiko e na vanua o Naqavoka, ka vakabibi ni liutaka sara tikoga na Gone Turaga na Roko Tui Toga na nodratou talaci e na yakavi ni Siga Tabu.
Sa tu na nona vakanuinui o Vaqiri ni na vakalougatataka na dela ni soso kei na i qoliqoli nodra na Roko Tui Toga na Kalou sa cecere sara ka me vuavuai vinaka tikoga na nodra veigauna sa tu e matadra, ka vakakina na veisiga ni mataka.