E vakasuasuwana vakalailai na dela ni soso ni koro ko Muana, mai Toga Naqavoka, na uca ni veivakalougatataki, ni bera ni qai tekivu na nodra soli ni Nakorolevu Day ena mataka ni siga Vakarauwai ena macawa sa oti.
Era osota na nodra dui vakatunuloa na lewe ni mataqali e lima, ka vakakina o ira na nodra dui vulagi sureti.
Taumada na kena vakayacori na lotu mai vei Jekope Serukalou na i Vakatawa ni koro ko Muana, ka vakabibitaka e na nona i vunau, ni veika e vakayacori ena siga oya e dodonu me ra vuli tiko mai kina na gone, me ra kila ni solesolevaki duadua ga e na rawa ni rawati kina na veika vinaka.
Ni sa dolavi oti vakalotu na soqo ena siga oya, e sa qai soli na gauna vei ira na vei mataqali me ra vakacabora na nodra i sevusevu vei ira na nodra dui vulagi, kei na veiwekani vakadra ka ra cau yani e na nodra dui vakatunuloa.
Oti ga na cabori ni sevusevu, era sa malaude kecega na loma ni vei vakatunuloa e na veisolevuti, sala kaya na malaude ni vakatagi rogorogo vinaka e ratou vakarautaka toka mai na komiti ni soli.
Ni qai voleka na 11 na kaloko e na mataka lailai, sa kacivaki mai, ni gauna oya era sa kerei kina na vei mataqali, me ra la?ki tauca na i matai ni nodra tau soli.
E oso na loma ni rara e na levu ni veisolevuti ka lakovata na tuisi e na kena veimataqali, e na gauna e vakayacori tiko kina na i matai ni tau soli.
Na gauna e sa oti kina na i matai ni tau soli, e sa qai bula ga na gunu yaqona, ka sega ni lala na loma ni rara e na nodra vakayagataka toka na lewe ni koro na vakatagi ka yavalata na nave, ka o na sega ni via dabe tiko kina vakadua.
Dede ga vakalailai sa vakayacori sara na i vakasigalevu e na nodra dui vakatunuloa, ka vakatitiweli ga na veimataqali kakana era dui vakarautaka vei ira na nodra dui mataqali, ka curu maliwai ira tiko na qalu ni mataqali o Namadadredre.
Na gauna ga e vakayacori tiko kina na vakasigalevu, ratou sa qai tukuna mai na komiti, me ra yadua na i tavi na vei mataqali, me tekivu mai na mataqali o Namadadredre ka yacova sara na mataqali e na i tikotiko e Nokorokoro.
E so na vosa e ra dui tauca na vei mataqali e vakaciriloloma, ka so na vosa e lasa tale ni da rogoca e na gauna era sa dui vosa tiko kina na nodra mata.
Na i karua, ka i otioti talega ni tau soli e a qai vakayacori tiko e na 4 na kaloko e na yakavi ka ra veisisivi tale kina na mataqali e lima.
Ia, ni sa mai cava na soli e na siga oya, e sa qai vakatoka oqo na kena veitaravi: Mataqali Namadadredre-$5,194.25, Waisousou-$4,564.85, Vunivaivai-$1,362.40, Nakorokoro-$1,134.90, Natikoriwaca-$447.85 kei na timi ni rakavi na B.L.K. Nakorolevu-$137.15.
Ni sa la?ki dre ko Malolo e na yakavi ni siga oya, e ratou sa qai soqona na komiti na i lavo vakaitamera e na Siga kei Nakorolevu e $12,841.40, ka ratou vakavinavinaka sara vakalevu na lewe ni komiti vei kemuni na lewe ni yavusa o Nakorolevu, e na rogo kaci, kei na yalo vinaka.
Ni sa oti kece na soli, e sa qai tini tale vaka lotu na solevu ni bera ni qai mai carubi na sigidrigi e na vei vakatunuloa, kei na veilasamaki ni sa mai rawa e dua na i tavi lagilagi.
Na i lavo kece e rawa e na siga Vakarauwai ena vakayagataki vakatabaki dua sara ga e nakoro, ka vakakina na soli ni yasana o Rewa, na soli ki na koronivuli ni Tikina, kei na veika e gadrevi taumada e nakoro.
Sa vakanuinui tu na Komai Nakorolevu ka vakakina o ira na Turaga ni vei Mataqali, ni na sobuta na veimatavuvale yadua, na loloma ni Kalou, ka na vuavuai vinaka tikoga na nodra lololo, me rawa ni levu cake sara na i lavo era na rawata e na gauna vata ga oqo e na vula o Noveba ni yabaki vou.
