“Sa siviyara tale tu e dua na block (tiki ni qele vakarautaki). Keitou sa nanuma tiko me qai yabaki mai qo me sa cawiri ga na itei.
“Na yabaki qo, keitou se oga vakalevu ena kena vakarautaki na qele. Kila, na bucabuca keitou tiko kina qo e Nasarawaqa (Bua) e bau levu toka kina na vatu.”
Qo eso na e tukuna toka mai o Uate Urovakavonu ena Vakaraubuka sa oti na ika 22 ni Noveba ni vosa toka mai ena loma ni veimeleni mai Bua.
Na turaga ni Navatu, Cakaudrove qo e tukuna ni sa dodonu me da sa lesu kece kina qele baleta na bula dina e tu kina.
“Na meleni keitou tea qo na wekaqu, e 65 ga na siga esa matua. Ya e sivi ga vakalailai e rua na vula,” e kaya o Urovakavonu.
Ena nona otioti ni veitaratara mai, e tukuna o Urovakavonu ni ratou se oga tiko vakalevu ena kena vakarautaki na qele. Ia qo e ratou sa tatamusuki.
“Na Vakarauwai sa oti (na ika 16 ni Noveba), a mai voli sara e logana na neitou itei. E voli ena $1 dua na kilo. Vei keitou, ya sa bau dua na isau vinaka ni keitou sega ni oga na kauta kina makete me keitou lai volitaka.”
E tukuna o Urovakavonu ni ratou a taura e sivia ni $3000. Ni a volitaki na $1 dua na kilo, sa na sivia toka vakalailai na 3 na tani na meleni e ratou tamusuka.
Kaya o Urovakavonu ni a gole talega kina nodratou valenivolavola ni lotu (na Assemblies of God) e Labasa me lai tukuna kina na nona kosipeli.
E uto tiko ni nona itukutuku o Urovakavonu ni sa dodonu me da lesu kece kina qele baleta ya na vanua e tiko kina na bula vinaka ka dina.
