ESA mai dolavi tale na noda Palimedi e Viti ena macawa oqo ni oti na macala ni veidigidigi ena macawa rua sa oti.
Esa mai digitaki talega me na taura na i tutu ni Sipika o Vuniwai Jiko Luveni ka na tomana tale na veiqaravi oqo ena loma ni yabaki va sa tu mai oqo.
E mai dolava na Palimedi na noda Peresitedi o Jioji Konrote ka vuqa sara na i tukutuku bibi e mai vakaraitaka e na nona vosa vei ira na lewe ni Palimedi. Era sa mai vosa ni bubului talega ena siga Moniti na lewe ni palimedi e lewe 51 oqo.
Me vaka e sa namaki tiko ka ra tukuna na daunididigo ni sa na levu sara na veitalanoa kei na vakasama vinaka e na rawa ni vakarogoca mai vei ira na lewe ni Palimedi.
Ena macawa oqo era sa tekivu cau tiko na lewe 51 na lewe ni Palimedi ena vuku ni nodra rai ena vosa e mai dolava kina na Palimedi vou oqo na noda Peresitedi.
E da sa vakanuinui tu na lewei Viti ni ra na qarava vinaka sara na nodra i tavi na lewe ni Palimedi eda sa digitaki ira mera na laki vakatulewa vakadodonu ka mera na raica ni vakatulewa era cakava ena kauta mai na bula vinaka vei keda kece.
E dua na ulutaga e kauta cake mai o Viliame Gavoka mai na i To ni Veisaqa oya na kena dikevi tale na vuna era sega ni la’ki vakaitavi kina ena veidigidigi e dua na i wase levu ni lewenivanua e dodonu me ra vakaitavi.
E dodonu me na raica sara vakayalomatua na tikina oqori na valenivolavola ni veidigidigi ka me na vakavinakataki eso na veika e ratou nanuma me na vaqaqacotaki ena vuku ni veidigidigi ka tarava.
Ki na qito, eda marautaka kece na lewenivanua e Viti na nodratou mai qaqa ka ratou lave rara mai Varanise na noda timi ni rakavi lewe 15 ena mua ni macawa.
E mai rawata e 21 na poidi na noda mata timi ka ratou rawata e 14 na mata timi ni Varanise.
Oqo e dua na i cavauisasau levu ni timi rakavi 15 e Viti ka sa mai tosoya cake sara ki na naba walu na nodratou i tutu na Flying Fijians.
E da vakavinavinataka na dauniveitokoni ni ratou a cakacaka vata na mata timi kei na nodratou gadreva mai vuniyalodratou me ratou rawata na qaqa, e qai yaco me vakakina ka sa levu na nodratou marau.
Ena mua ni macawa oqo e sa vakanamata talega na dauniveitokoni ni timi leyavitu ki na sotasota ni Dubai 7s ena mua ni macawa oqo.
E dina ni da a sega ni vakaitavi vinaka ena sota ni vuravura mai Amerika ka mai qaqa kina na timi ni Niusiladi, ia esa tiko na vakanuinui ni ratou na rawata na qaqa na timi ni Viti ena dua tale na yabaki vou ni IRB Sevens Series.
Ka meda na veitokoni talega vei iratou na mata timi ni Viti ena veimasulaki kei na veitokoni ena gauna eratou druka mai kina se qaqa, e ka bibi na noda tokona tikoga na timi ni noda vanua ena veigauna kece.
