ENA mai talaci tiko vakadua ena siga ni kua e Namada, Baravi, Nadroga na yago i Ilikimi Torosi e dua esa matataka oti na noda timi lewe ya tinikalima rakavi ena noda vanua.
E a mai leqa o Torosi ena siga Vukelulu ena macawa sa oti ni ena gauna e a vakaukauwa yago voli kina mai Nadi ka vakabauti ni a tauvi mate ni uto.
O Torosi e a tekivu lewena tu na timi kaukauwa ni Mataivalu mai na yabaki 1985 ena siqeleti naba rua ka digitaki tale ga kina timi ni Suva ka qito vata kei ira eso na yaca rogo me vakataki Esala Teleni, Koli Rakoroi, Sela Gutugutuwai, Pita Naruma, Nemani Matirewa, Mosese Taga, Ilaitia Savai, Tevita Vonolagi, Sekove Sadria, Mesake Rasari, Salacieli Naiviliwasa, Alifereti Dere ka timi oqori ea maroroya tu mai na bilo na Farebrother me va na yabaki mai na 1988 ki na 1991.
Ea gole tale ga vakarua ena qito wavoki mai Urope mai na yabaki 1989 kei na 1991.
Ea bau matataki Nadroga kei Lautoka tale ga ena sotasota ni veiyasana ena kena qitotaki na bilo na Telecom.
Tukuna o Simione Roqica e dua e rau a qito vata ena timi ni Mataivalu ni dua o Torosi na dauqito e dau solia nona i gu taucoko e loma ni rara ni qito.
Vetalia ke qitotaka na timi ni Mataivalu, Suva se timi ni Viti, e dau solia e dua na drau na pasede nona i gu ka dau sega ni kauwaitaka na i rogorogo ni timi se ocei na yaca rogo e qito mai yasana ka dua, tukuna o Roqica.
E sa yabaki 47 e na nona mai kacivi nona bula ka bula tiko na marama watina kei rua na luvedrau.
